Azərbaycan Xalq Cümhuriyyətinin yaranmasının 100 illik yubileyi Şuşa Rayon İcra Hakimiyyətində qeyd edilib
Bakı, 22 may, AZƏRTAC
Şuşa Rayon İcra Hakimiyyətinin təşkilatçılığı ilə mayın 22-də Azərbaycan Xalq Cümhuriyyətinin yaranmasının 100 illik yubileyi münasibətilə tədbir keçirilib.
Şuşa RİH-dən AZƏRTAC-a bildiriblər ki, tədbirdə Şuşa Rayon İcra Hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İdarə Heyətinin sədri-icmanın rəhbəri Bayram Səfərov, Aparat işçiləri, tarixçi alimlər, idarə, müəssisə rəhbərləri, rayonun ümumtəhsil məktəblərinin tarix müəllimləri iştirak ediblər.
Tədbirdə əvvəlcə Azərbaycan Respublikasının dövlət himni səsləndirilib.
Bayram Səfərov çıxış edərək bildirib ki, xalqımızın və milli dövlətçiliyimizin tarixində özünəməxsus yer tutan Azərbaycan Xalq Cümhuriyyəti mürəkkəb bir dövrdə meydana gəlib və çox çətin şəraitdə fəaliyyət göstərib. O deyib: “Azərbaycan Xalq Cümhuriyyəti yarandığı ilk günlərdən özünün ərazi bütövlüyünü və sərhədlərinin toxunulmazlığını qorumaq üçün fəal mübarizə aparıb. Azərbaycan hökumətinin ən başlıca vəzifəsi Dağlıq Qarabağda erməni separatizmini ləğv etmək idi. On doqquzuncu əsrin sonlarından başlayaraq erməni millətçiləri “Böyük Ermənistan” yaratmaq ideyasını həyata keçirmək üçün geniş fəaliyyətə başlamış, Azərbaycanın əzəli torpaqları olan Qarabağ, Naxçıvan və Zəngəzur bölgələrinə yiyələnmək üçün cəhdlər göstərirdilər. Bu istiqamətdə onların ilk hədəfi Zəngəzur və Qarabağı ələ keçirmək idi. Ancaq Azərbaycan hökumətinin barışmaz mövqeyi ermənilərin planlarının gerçəkləşməsinə imkan vermədi. Ermənistan Respublikası bu gün də işğalçılıq siyasətini davam etdirir. 1988-ci ildən başlayaraq Ermənistan silahlı qüvvələrinin ölkəmizə hərbi təcavüzü nəticəsində Azərbaycan torpaqlarının 20 faizi - Dağlıq Qarabağın və ətraf 7 rayonun - Ağdamın, Laçının, Zəngilanın, Füzulinin, Cəbrayılın, Qubadlının, Kəlbəcərin ərazisi işğal olunub. Ermənistanın hərbi təcavüzü nəticəsində 20 min nəfər həlak olub, 50 min nəfər yaralanıb, təxminən 5 min nəfər əsir və itkin düşüb. Azərbaycanda 1 milyon 200 mindən çox qaçqın və məcburi köçkün vardır. Prezident İlham Əliyevin Ermənistan-Azərbaycan, Dağlıq Qarabağ münaqişəsinə dair mövqeyi qəti və dəyişməzdir. Dövlətimizin başçısı dəfələrlə bəyan edib ki, bu münaqişə yalnız və yalnız Azərbaycanın ərazi bütövlüyü, beynəlxalq hüquq normaları çərçivəsində həll olunmalıdır”.
Sonra Azərbaycan Xalq Cümhuriyyəti haqqında sənədli film nümayiş etdirilib.
Azərbaycan Respublikasının Prezidenti yanında Dövlət İdarəçilik Akademiyasının kafedra müdiri, Tarix üzrə fəlsəfə doktoru, dosent Firdovsiyyə Əhmədova, tarix üzrə fəlsəfə doktoru Yunis Hüseynov, Sumqayıt Dövlət Universitetinin “Sosiologiya və politologiya” kafedrasının dosenti Cavid Məmiyev, Şuşa Mərkəzi rayon Xəstəxanasının baş həkimi Ramiq Məhərrəmov öz çıxışlarında Azərbaycan Xalq Cümhuriyyətinin cəmi 23 ay fəaliyyət göstərməsinə baxmayaraq, həyata keçirilən tədbirlərin müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb etdiyini vurğulayıblar.
Bölmənin digər xəbərləri
