Azərbaycan xalqının ümummilli lideri Heydər Əliyevin xatirəsi Ukrayna paytaxtında anılıb
Kiyev, 10 may, AZƏRTAC
Azərbaycanın Ukraynadakı səfirliyinin təşkilatçılığı ilə mayın 10-da Kiyevin tarixi mərkəzində yerləşən Heydər Əliyev Parkında Ulu Öndərin anadan olmasının 92-ci ildönümü ilə bağlı təntənəli tədbir keçirilib.
Tədbirin iştirakçıları əvvəlcə ümummilli lider Heydər Əliyevin abidəsi qarşısına gül qoydular.
Səfir Eynulla Mədətli müasir müstəqil Azərbaycan dövlətinin memarı və qurucusu, xalqın xilaskarı Heydər Əliyevin ölkəmizin inkişafında və çiçəklənməsində tarixi rolunu vurğuladı.
Diplomat qeyd etdi ki, əsası ulu öndər Heydər Əliyev tərəfindən qoyulan daxili və xarici siyasət kursunu hazırda Prezident İlham Əliyev müvəffəqiyyətlə davam etdirir. Sonra səfir Azərbaycanda iqtisadiyyat, humanitar, sosial, səhiyyə sahələrində əsaslı islahatlardan, Bakıda keçiriləcək birinci Avropa Oyunlarına hazırlıq işlərinin Azərbaycanın birinci xanımı, Heydər Əliyev Fondunun prezidenti Mehriban Əliyevanın rəhbərliyi ilə uğurla aparılmasından söz açaraq vurğulayıb ki, xarici “xadimlərin” və ermənipərəst qüvvələrin Azərbaycanda möhtəşəm kontinental idman yarışlarının keçirilməsinə mane olmaq niyyətləri puça çıxacaq. E.Mədətli bildirib ki, “Bakı- 2015” Azərbaycanda Olimpiya hərəkatının inkişafının parlaq təsdiqi və əsası Ulu Öndər tərəfindən qoyulan dövlətçiliyimizin təntənəsi olacaq.
Səfir Kiyevdə baxımsız qalan bağçanın yerində Heydər Əliyevin adını daşıyan bir gözəl bir parkın salınmasına görə Azərbaycan Respublikasının Dövlət Neft Şirkətinə (SOCAR) minnətdarlığını bildirib. Kiyev meriyası tərəfindən ən gözəl park adlandırılan bu istirahət guşəsi Ukrayna paytaxtında akkreditə olunmuş xarici səfirliklərə nümunə kimi tövsiyə edilib.
O, tədbir iştirakçılarını Qələbə Günü münasibətilə də təbrik edib.
Türkmənistanın Ukraynadakı səfiri Nurberdı Amanmuradov, Türkiyə diplomatik nümayəndəliyinin başçısı Yonet Can Tezel, Ali Radanın xalq deputatı Anatoli Raxanski, Ukraynanın Dağıstan icmasının başçısı Zubair Kadırxanov Azərbaycan xalqının dahi oğlu, müasir dövrün görkəmli dövlət və siyasi xadimi, Ukraynanın böyük dostu ümummilli lider Heydər Əliyevdən ehtiram və hörmətlə danışıblar.
Ukrayna Azərbaycanlıları Birləşmiş Konqresinin rəhbəri Rövşən Tağıyevin, Ukrayna Azərbaycanlı Gənclər İttifaqının başçısı İlhamə Allahverdiyevanın, “Ukrayna Azərbaycanlılarının Birləşmiş Diasporu” Ümumukrayna İctimai Təşkilatının sədri Hikmət Cavadovun və başqalarının çıxışları Azərbaycanın gənc nəsli adından ulu öndər Heydər Əliyevin parlaq xatirəsinə minnətdarlıq dolu sözlərlə zəngin olub.
Sonra Heydər Əliyev Parkında Azərbaycan şirniyyatı ilə çay süfrəsi təşkil edilib, Ukraynanın Xalq Artisti Qurban Abbasovun rəhbərlik etdiyi “Azərbaycan” kvartetinin ifasında klassik musiqi səslənib.
Tədbirdə GUAM-ın baş katibi Valeri Çeçelaşvili, Gürcüstan səfiri Mixeil Ukleba, Moldova səfiri İon Stevile, Özbəkistan səfiri Alişer Abduəliyev, Azərbaycan səfirliyinin əməkdaşları, SOCAR-ın Kiyev ofisinin top-menecerləri, Dnepropetrovsk Vilayət Şurasının deputatı Fəxrəddin Muxtarov, “Azərbaycançılıq İnstitutu”nun prezidenti, Ukrayna Azərbaycanlıları Konqresinin Kiyev şəhər təşkilatının sədri Oleq Krapivin, “Akkord” şirkətlər qrupunun Ukrayna təmsilçiliyinin başçısı Sahib Məmmədov, diaspor və gənclər təşkilatlarımızın rəhbərləri və fəalları, şəhər ictimaiyyətinin, Azərbaycan, Türkiyə və Ukrayna KİV-lərinin nümayəndələri iştirak ediblər.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
