Azərbaycan XİN Fərid Səfərli ilə bağlı İranın ölkəmizdəki səfirliyinə nota ünvanlayıb
Bakı, 9 mart, AZƏRTAC
Xarici İşlər Nazirliyinin Mətbuat xidməti idarəsinin rəisi Ayxan Hacızadə Azərbaycan vətəndaşı, Almaniyanın Yena Universitetinin tələbəsi 1997-ci il təvəllüdlü Fərid Qabil oğlu Səfərlinin fevralın 20-də İrana səfərə getməsi, martın 4 -dən bəri ondan xəbər alınmasının mümkün olmaması ilə bağlı yerli medianın sualını cavablandırıb.
AZƏRTAC xəbər verir ki, A.Hacızadə bununla bağlı deyib: “Sözügedən məlumata aydınlıq gətirilməsi məqsədilə, Xarici İşlər Nazirliyi müvafiq olaraq İranın ölkəmizdəki səfirliyinə nota ünvanlayıb və hazırda qarşı tərəfdən cavab gözləyir”.
O bildirib ki, Azərbaycan Respublikasının vətəndaşı Fərid Səfərlinin yerinin müəyyənləşdirilməsi istiqamətində müvafiq tədbirlər və araşdırma işləri davam edir. Məsələ ilə bağlı ictimaiyyətə əlavə məlumat veriləcək.
“Azərbaycan Respublikasının vətəndaşlarına bir daha xatırlatmaq istərdik ki, bu il yanvarın 27-də ölkəmizin İrandakı səfirliyinə qarşı baş vermiş terror hücumundan sonra Azərbaycan Xarici İşlər Nazirliyi ölkəmizin vətəndaşlarına zəruri olmadığı təqdirdə İrana səfər etməməyi, səfər edənlərin isə yüksək ehtiyatlılıq nümayiş etdirmələri barədə səyahət xəbərdarlığı yayıb”, - deyə A.Hacızadə vurğulayıb.
Bölmənin digər xəbərləri
