AZƏRBAYCAN YIĞMASI AVROPA ÇEMPİONLARINA MƏĞLUB OLMUŞDUR
Bakı, 9 iyun (AZƏRTAC). Azərbaycanın futbol üzrə yığma komandası iyunun 9-da Tofiq Bəhramov adına Respublika stadionunda sonuncu Avropa çempionu İspaniya millisinə 0:6 hesabı ilə məğlub olmuşdur.
Oyunun yoldaşlıq xarakteri daşımasına baxmayaraq, hər iki komanda meydanda əsl mübarizədən çəkinmirdi. Xüsusilə, Avropa çempionlarının heyətində tanınmış futbol ulduzlarının yer alması artıq ilk dəqiqələrdən maraqlı oyunun olacağından xəbər verirdi.
İspaniya yığması görüşə İker Kasilyas, Raul Albiol, Joan Kapdevilya, Sesk Fabreqas, David Vilya, Fernando Torres və dünyanın digər tanınmış ulduz futbolçuları ilə çıxmışdı.
Artıq ilk hissədən sonra qonaq komanda hesabda 3 topla irəlidə idi. Hər üç qolu “Valensiya”nın futbolçusu David Vilya vurmuşdu.
İkinci hissədə İspaniya yığmasının baş məşqçisi Del Boske heyətdə bəzi dəyişikliklər etdi. Meydana qapıçı Xose Manuel Reyna, Serxio Buskets, Serxio Ramos, Daniel Guiza və Karlos Puyol çıxdılar.
Qonaq komanda ikinci hissədə də oyunda diqtə edən tərəf idi. Nəticədə Albert Riyera, Daniel Guiza və Fernando Torres Azərbaycan yığmasının qapısından daha 3 top keçirdilər.
Beləliklə, oyun 0:6 hesabı ilə qonaq komandanın xeyrinə başa çatmışdır.
######
 |
 |
Bölmənin digər xəbərləri
