AZƏRBAYCAN YIĞMASI DÜNYA KUBOKU UĞRUNDA TURNİRİN BÜRÜNC MEDALINI QAZANMIŞDIR
Bakı, 14 iyun (AZƏRTAC). Azərbaycanın taekvondo üzrə kişilərdən ibarət yığma komandası Bakıda keçirilən dünya kuboku uğrunda turnirin bürünc medalını qazanmışdır.
Yarımfinalda Türkiyə millisinə məğlub olmasına baxmayaraq, meydan sahibləri yarışı üçüncü yerdə bitirməyə müvəffəq olmuşlar.
Türkiyə yığması ilə görüşdə yığmamızın heyətində Zahid Məmmədov (54 kq), İlkin Şahbazov (72 kq), Təvəggül Bayramov (82 kq-dan yuxarı) rəqiblərinə uduzmuşlar.
Bu görüşlərdən sonra Türkiyə yığması 3:0 hesabı ilə irəlidə olduğundan yığmamız çıxışını dayandırmağa qərar vermişdir.
Türkiyə yığması isə qızıl medallar uğrunda İran komandası ilə qarşılaşmışdır. Həlledici görüşdə Türkiyə taekvondoçuları 3:2 hesabı ilə qələbə qazanaraq dünya kuboku uğrunda turnirin qalibi olmuşlar.
Beləliklə, İran millisi gümüş medallara layiq görülmüşdür. Yarımfinalda İran komandasına uduzan Rusiya yığması isə Azərbaycan komandası ilə yanaşı, bürünc mükafatın sahibi olmuşdur.
Qadınların yarışında Koreya komandası birinci yeri tutmuşdur. Rusiya millisi gümüş, Türkiyə və Mərakeş komandaları isə bürünc medallara sahib olmuşlar.
Qaliblərə mükafatları Azərbaycan Taekvondo Federasiyasının prezidenti Kəmaləddin Heydərov, Beynəxalq Taekvondo Federasiyasının prezidenti Çunq Von Co təqdim etmişlər.
######
 |
 |
 |
Bölmənin digər xəbərləri
