AZƏRBAYCAN YIĞMASI DÜNYA KUBOKU UĞRUNDA TURNİRİN DÖRDDƏBİR FİNALINA VƏSİQƏ QAZANMIŞDIR
Bakı, 13 iyun (AZƏRTAC). Azərbaycanın taekvondo üzrə kişilərdən ibarət yığma komandası Bakıda keçirilən dünya kuboku uğrunda turnirin dörddəbir finalına vəsiqə qazanmışdır.
Yığmamız bu nəticəyə İtaliya millisi üzərində 5:0 hesabı ilə qələbə qazanmaqla nail olmuşdur.
Komandamız qrup ikincisi kimi növbəti mərhələyə çıxmaq üçün İtaliya millisini böyük hesabla məğlub etməli idi.
Millimizin heyətində dayanq üzərinə birinci 54 kiloqram çəki dərəcəsində yarışan Samir Aydınov çıxmışdır. O, Salvadore Sanqreqorio ilə görüşdə qələbə qazanaraq (3:1) komandamızı hesabda irəli çıxarmışdır - 1:0.
Rövşən Məmmədovun (63 kq) rəqibi Klaudio Trevizo isə zədəli halda döyüşə bilmədiyi üçün idmançımıza texniki qələbə verilmişdir.
İlkin Şahbazov (72 kq) - Fabio Sottile dueti isə Azərbaycan taekvondoçusunun qələbəsi ilə başa çatmışdır - 11:1.
Bu görüşdən sonra ümumi komanda hesabında Azərbaycan yığmasının qələbəsi artıq məlum idi. Növbəti iki duetin - Ramin Əzizov (82 kq) - Mauro Sarmiento və Təvəkkül Bayramov (82 kq yuxarı) - Karlo Molfetta görüşlərinin nəticəsini gözləməyən İtaliya komandası çıxışını dayandırmağa qərar verdi. Beləliklə, Azərbaycan millisi 5:0 hesabı ilə qələbə qazanaraq qrupda ən yaxşı ikinci nəticəni göstərmiş komanda kimi dörddəbir finala vəsiqə qazandı.
Xatırladaq ki, reqlamentə əsasən, dörddəbir final mərhələsinə qrup qalibləri və ikinci yeri tutmuş ən yaxşı iki komanda vəsiqə qazanır.
Yığmamızın yer aldığı F qrupunda Rusiya komandası bütün görüşlərini qələbə ilə başa vuraraq dörddəbir finala vəsiqə qazanmışdır. Rusiyalılar sonuncu qrup qarşılaşmasında Braziliya milli kollektivini məğlub etmişlər.
Qadınlardan ibarət Azərbaycan yığması isə Braziliya millisinə 4:1 hesabı ilə məğlub olaraq yarışda çıxışını dayandırmışdır.
######
 |
 |
Bölmənin digər xəbərləri
