AZƏRBAYCAN YIĞMASI İTALİYA MİLLİSİNİ 5:0 HESABI İLƏ MƏĞLUB ETMİŞDİR
Bakı, 13 iyun (AZƏRTAC). Azərbaycanın taekvondo üzrə kişilərdən ibarət yığma komandası dünya kuboku uğrunda turnirdə İtaliya millisini 5:0 hesabı ilə məğlub etmişdir.
Azərbaycan yığması qrup ikincisi kimi növbəti mərhələyə çıxmaq üçün İtaliya millisini böyük hesabla məğlub etməli idi.
Yığmamızın heyətində dayanq üzərinə birinci 54 kiloqram çəki dərəcəsində yarışan Samir Aydınov çıxmışdır. O, Salvadore Sanqreqorio ilə görüşdə qələbə qazanaraq (3:1) komandamızı hesabda irəli çıxarmışdır - 1:0.
Rövşən Məmmədovun (63 kq) rəqibi Klaudio Trevizo isə zədəli halda döyüşə bilmədiyi üçün idmançımıza texniki qələbə verilmişdir.
İlkin Şahbazov (72 kq) -Fabio Sottile dueti isə Azərbaycan taekvondoçusunun qələbəsi ilə başa çatmışdır - 11:1.
Bu görüşdən sonra ümumi komanda hesabında Azərbaycan yığmasının qələbəsi artıq məlum idi. Növbəti iki duetin Ramin Əzizov (82 kq) - Mauro Sarmiento və Təvəkkül Bayramov (82 kq yuxarı) - Karlo Molfetta görüşlərinin nəticəsini gözləməyən İtaliya komandası çıxışını dayandırmağa qərar verdi. Beləliklə, Azərbaycan millisi 5:0 hesabı ilə qələbə qazandı.
Millimizin növbəti mərhələyə vəsiqə qazanıb qazanmadığı isə günün sonunadək bütün qruplarda görüşlərin yekun nəticəsindən sonra məlum olacaqdır.
Xatırladaq ki, reqlamentə əsasən, dörddəbir final mərhələsinə qrup qalibləri və ikinci yeri tutmuş ən yaxşı iki komanda vəsiqə qazanır.
Yığmamzın yer aldığı F qrupunda Rusiya komandası bütün görüşlərini qələbə ilə başa vuraraq dörddəbir finala vəsiqə qazanmışdır. Rusiyalılar sonuncu qrup qarşılşmasına Braziliya milli kollektivini məğlub etmişdilər.
Bölmənin digər xəbərləri
