MƏDƏNİYYƏT
Azərbaycanda daşınar mədəni irs: Muzey işi və müasir çağırışlar
Bakı, 18 dekabr, AZƏRTAC
Dekabrın 18-i Heydər Əliyev Fondu və Mədəniyyət Nazirliyinin təşkilatçılığı ilə keçirilən “Mədəni irs” Forumunda “Azərbaycanda daşınar mədəni irs. Muzey işi və müasir çağırışlar” mövzusunda müzakirələr aparılıb.
AZƏRTAC xəbər verir ki, paneldə moderator Heydər Əliyev Mərkəzinin Layihələrin idarə edilməsi departamentinin direktoru Nərgiz Abdullayeva olub.
Əsrlərin atribusiyası məsələsinə toxunan Azərbaycan Milli İncəsənət Muzeyinin direktoru, Beynəlxalq Muzeylər Şurasının (ICOM) Azərbaycan Milli Komitəsinin sədri Şirin Məlikova, ölkəmizin milli eksponatları haqqında natamam məlumatlar olduğunu qeyd edib: “Eksponatlar İran, Qafqaz, bəziləri isə Ermənistan aid nümunələr kimi təqdim olunur. Biz bu muzeylərlə əlaqə qurub bu məlumatlarda düzəliş edilməsini tələb etməliyik”.
Azərbaycan Milli Xalça Muzeyinin fəaliyyəti barədə danışan Ş.Məlikova, muzeydə bir çox layihələrin gerçəkləşdiyini söyləyib: “Bizim işimiz muzeyləri mədəni tədrisə, elmi-tədqiqat mərkəzlərinə çevirməkdir. Bu işlər geniş səpkidə Xalça Muzeyində təşkil olunur. Muzeydə daimi olaraq mühazirələr, ustad dərsləri və bir çox tədbirlər keçirilir”.
Onun sözlərinə görə, son illər ərzində 28 ölkənin 82 muzeyində 1000-dən çox Azərbaycan xalçaları saxlanılır. İncəsənət Muzeyinin direktoru Azərbaycan Milli Xalça Muzeyinin ölkəmizin ilk inklüziv muzeyi olduğunu vurğulayıb və digər muzeylərin gələcəkdə bu təcrübədən yararlanmasının önəmini vurğulayıb.
Azərbaycan Dövlət Gömrük Komitəsinin nümayəndəsi Vasif Qurbanov bildirib ki, gömrük orqanlarında əsas məsələlərdən biri mədəni irsin qorunması, gömrük sərhədindən nümunələrin qanunsuz keçirilməməsidir.
O, mədəni sərvətlərin idxalı, ixracı və tranziti qaydaları haqqında danışıb. “Gömrük işçilərinə mədəni sərvətlərlə bağlı bilik səviyyəsinin artırılması üçün təlimlər keçirilir, həmçinin sərhədkeçmə, gömrük əməliyyatların sürətli keçidi üçün operativ qrup yaradılıb”, - deyə o əlavə edib.
Mədəniyyət Nazirliyinin sektor müdiri, sənətşünaslıq üzrə fəlsəfə doktoru Altun Mikayıllı mədəni sərvətlərin ölkəyə geri qaytarılması, onlara şəhadətnamələrin verilməsi barədə məlumat verib.
Muzey Sərvətləri və Xatirə Əşyalarının Elmi Bərpa Mərkəzinin direktoru Zərifə Məlikova mərkəzin fəaliyyəti haqqında danışıb: “1957-ci ildən bu günədək mərkəz 30 mindən artıq muzey əşyaları bərpa edib: xalçalar, qrafik əsərlər və s. Mədəniyyət Nazirliyinin nəzdində fəaliyyət göstərən 230 yaxın muzeyə bərpa xidməti göstəririk. Həmçinin Cəbrayıl, Şuşa, Ağdam muzeylərinin muzey əşyalarının böyük hissəsini biz bərpa etmişik”.
Z.Məlikova mərkəzin həm də bir məktəb olduğunu qeyd edib. Onun sözlərinə görə, burada bir çox mütəxəssislər yetişib.
Azərbaycan Milli İncəsənət Muzeyinin Elmi-bərpa şöbəsinin müdiri, Əməkdar rəssam, ali dərəcəli bərpaçı-rəssam Natiq Səfərov, Heydər Əliyev Mərkəzinin nümayəndəsi Zafiq Xəlilov, İşğal və Zəfər muzeylərinin təşkili üzrə kreativ direktor, ekspert Fabrisio Konti muzey fondlarının qorunmasında bərpa və konservasiya məsələləri, işğaldan azad olunmuş ərazilərdə muzeylərin bərpası, İşğal-Zəfər muzeyləri, maddi-texniki bazanın gücləndirilməsi, müasir muzeylər, Heydər Əliyev Mərkəzinin Muzey və sərgi fəaliyyəti haqqında danışıblar.
Panel sessiyada iştirakçıları maraqlandıran suallar cavablandırılıb.