AZƏRBAYCANDA RUSİYA İLİ ÇƏRÇİVƏSİNDƏ BAKIDA BİRİNCİ BEYNƏLXALQ RUS KİTABI FESTİVALI KEÇİRİLƏCƏK
Təşkilat komitəsinin rəhbəri Yakov Borovoy AZƏRTAC-ın müxbirinə bildirmişdir ki, indi bu mühüm beynəlxalq tədbirin keçirilməsinə fəal hazırlıq gedir. Bakıda rus kitabı festivalı xalqlarımız arasında mədəni əlaqələrin möhkəmləndirilməsi və humanitar sahədə daha sıx inteqrasiya baxımından böyük əhəmiyyətə malikdir. Bakının mənzərəli guşəsində - Milli parkda keçiriləcək festivalda Rusiyadan və digər ölkələrdən 150-dən çox yazıçı, şair, naşir, ədəbiyyat və mədəniyyət xadimi iştirak edəcəkdir. Sərgiyə gələnlərə 10 min nüsxədən çox müxtəlif kitab təqdim olunacaqdır. Bu dostluq və yaradıcılıq bayramında Azərbaycan mədəniyyət xadimləri də iştirak edəcəklər.
Festival zamanı fəxri qonaqların və nümayəndə heyətləri təmsilçilərinin Azərbaycan Prezidenti İlham Əliyev tərəfindən qəbul ediləcəyi gözlənilir. Festival iştirakçıları Heydər Əliyev Fondunda olacaq, “Şərq şairi və Qərb şairi: Nizami və Puşkin ənənələri”, “Rus və Azərbaycan ədəbiyyatlarında zamanların əlaqəsi” mövzularında “dəyirmi masalar” keçirəcəklər. Tədbirlər proqramına Azərbaycan Yazıçılar Birliyində, Rusiyanın Azərbaycandakı səfirliyində görüşlər də daxil edilmişdir. Azərbaycan Dövlət Filarmoniyasında rus poeziyası və ədəbiyyatı gecəsi keçirmək, habelə Azərbaycan və Rusiya incəsənət ustalarının iştirakı ilə konsert proqramları nəzərdə tutulmuşdur.
Bölmənin digər xəbərləri
