Azərbaycanda yeni milli parklar yaradılacaqdır

04.07.2011 [10:33]
Çap et
A⁺ A^-

Bakı, 4 iyun (AZƏRTAC). “2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı”nın həyata keçirilməsi üzrə tədbirlər planında (2011-2015-ci illər) Samur-Yalama Milli Parkının, Zaqatala Biosfer Rezervatının və Qızılağac Dənizkənarı Milli Parkının yaradılması nəzərdə tutulmuşdur.

Azərbaycan Ekologiya Standartları Monitorinq Fondundan AZƏRTAC-a verilən məlumata görə, meşə bərpası işlərinin genişləndirilməsi, meşə sahələrinin ümumi torpaq sahələrinə olan nisbətinin 12,5 faizə çatdırılması, atmosfer havasının qorunması, nəqliyyatın hərəkətindən yaranan səs-küyün azaldılması məqsədi ilə yolqoruyucu yaşıllıqların salınması da tədbirlər planında qeyd edilmişdir.

Sənəddə əhalinin içməli su ilə təminatını yaxşılaşdırmaq üçün kənd yerlərində su mənbələrinin qeydiyyata alınması və sanitar-mühafizə zonalarının müəyyən edilməsi, daşqınla bağlı zonaların xəritələşdirilməsi, mütəmadi olaraq proqnozların müvafiq qurumlara çatdırılması öz əksini tapmışdır.

2015-ci ilədək ətraf mühit üzrə Gəncə, Masallı, Quba, Şirvan və Şəkidə regional kompleks monitorinq laboratoriyaları yaradılacaqdır.