Bakı, 13 yanvar, AZƏRTAC

Tarix elə bir prosesdir ki, bəzən bir hadisə yüzillik bir gedişatı durdurur və yeni bir mərhələnin başlanğıcını qoyur. Bu baxımdan tam əminliklə demək olar ki, 2020-ci il sentyabrın 27-də başlayan, Zəfərlə başa çatan Vətən müharibəsi tək Azərbaycan üçün deyil, bütövlükdə region, hətta Balkan regionundan Uzaq Şərqə qədər böyük bir coğrafiyada Türk dünyası üçün yüksəliş dönəminin əsasını qoydu. Əli bəy Hüseynzadə, Ziya Göyalp, Yusif Akçura, Əhməd bəy Ağoğlu kimi dahi fikir adamlarımızın "XXI əsr türk əsri olacaq" öncəgörməsi özünü doğrultmaqdadır. Yeni qədəm qoyduğumuz 2023-cü illə bağlı Türk dünyasının iki böyük lideri - Türkiyə və Azərbaycan prezidentlərinin verdiyi mesajlar, göstərdiyi hədəflər yüz illərdi istiqlalı və hürriyyəti çeynənən bir millətin dünyada öz haqqına qovuşacağının anonsudur.

AZƏRTAC xəbər verir ki, bu fikirləri Milli Məclis sədrinin müavini Fəzail İbrahimli söyləyib.

Fəzail İbrahimli bildirib ki, qardaş Türkiyə Cümhuriyyəti bu il yaranmasının 100-cü ildönümünü qeyd edir. Türkiyə Prezidenti Rəcəb Tayyib Ərdoğanın "Türkiyənin 2023-cü il üçün hədəfi siyasətdə və iqtisadiyyatda dünya liderlərindən birinə çevrilməkdir" mesajı qardaş ölkənin yeni siyasi dönəmə başlayacağına işarədir. Azərbaycan Prezidenti İlham Əliyevin hələ 2013-cü ildə Türkdilli Dövlətlərin Əməkdaşlıq Şurasının sammitində çıxışında səsləndirdiyi "Türkdilli coğrafiyada isə inkişaf prosesi gedir. Bu, böyük sərvətdir. XXI əsr Türk dünyası əsri olmalıdır" hədəfini bu günlərdə sayın Ərdoğan "Türk əsri başlayır" deyə qətiləşdirdi.

Türk dünyasının gələcəyinə yönəlik bu mesajlar hazırkı geosiyasi durumdan qaynaqlanır ki, belə bir müsbət dəyişikliyin də əsas səbəbi yuxarıda qeyd etdiyimiz kimi, Azərbaycanın Qarabağ zəfəridir. İşğal altında saxlanılan Azərbaycan ərazilərinin azad edilməsi ilə regionda yeni reallıqlar yarandı və Türkiyə başda olmaqla bütün Türk dünyası qlobal müstəvidə yeni gücə çevrildi. Avrasiyanın qərbindən şərqinədək uzanan türk zolağının qızıl körpüsü olan Azərbaycan bu gün öz tarixi haqlarını bərpa etməklə də yüz illər boyunca dünya imperializminin parçaladığı Türk dünyasını coğrafi baxımdan birləşdirmək missiyasını yerinə yetirir. Azərbaycan Prezidenti İlham Əliyevin Yenil ildə xalqa təbrik çıxışında və yerli televiziya kanallarına müsahibəsində verdiyi mesajlar məhz bu hədəfi açıq göstərir.

Azərbaycanın Zəfər savaşının nəticələrinin dünyaya qəbul etdirilməsini vurğulayan ölkə rəhbəri tarixi torpaqlarımız olan Qərbi Azərbaycana qayıdış məsələsini yenidən gündəmə gətirərək “Biz heç vaxt reallaşması mümkün olmayan təşəbbüslərlə çıxış etmirik” mesajı ilə məsələyə möhür vurdu. Eyni zamanda, Bakıdan, Naxçıvandan keçməklə Türkiyəyə açılacaq yoldan danışan Prezidentin “Zəngəzur dəhlizinin reallaşması tarixi zərurətdir, Ermənistan istəsə də, istəməsə də bu, reallaşacaq” fikri bölgənin gələcək bütün taleyinin məhz Azərbaycan-Türkiyə maraqları çərçivəsində həll ediləcəyinə eyham vurmuş oldu. Bu layihənin icrası ilə Azərbaycan min illər boyu Türk nəzarətində olan tarixi İpək yolunun bərpasına nail olur. Tarixdə ilk dəfə olaraq Xəzər və Aralıq dənizləri birləşdirilib. Azərbaycan artıq bizim soy-kök qardaşlarımız, Xəzərin şərq sahilində yerləşən türkdilli ölkələr üçün tranzit ölkə rolunu oynayır. Dünya siyasi gücünün iqtisadi imkanlarla birbaşa bağlı olduğu indiki dönəmdə qədim İpək yolunun bərpası Türk əsrinin reallaşması üçün əvəzolunmaz şərtdir və bu proses də Azərbaycanın liderliyi ilə aparılır.

Diqqətə çatdırılıb ki, müstəqilliyinin ilk illərində ərazisi işğal olunmuş, iqtisadiyyatı çökmüş, dövlət olaraq varlığı belə sual altında olan Azərbaycanın bu gün tarixə möhür vuran, böyük bir regionun geosiyasi durumunu dəyişəcək prosesə start verməsi heç şübhəsiz uzun, çətin, amma şərəfli bir siyasi iradənin nəticəsidir. Bu gün ordusu və siyasi mövqeyi ilə dünyanın aparıcı ölkələri ilə bir sırada duran Azərbaycan qlobal iqtisadi böhran şəraitində nəinki işğaldan azad olunan ərazilərdə böyük tikinti-quruculuq layihələrini icra edir, həm də sosial islahatları davam etdirir. Bütün bunlar regionun lider dövləti kimi Azərbaycanın qüdrətinin və qarşıya qoyulan hədəflərə nail olunmasının əsas şərtidir.

Tarix həm də təsadüfləri sevmir. 2023-cü ildən Türk əsrinin başlaması həm də iki böyük Türk Liderinin adı ilə bağlıdır. Bu il dahi rəhbər Mustafa Kamal Atatürkün qurduğu Cümhuriyyətin və Ulu Öndər Heydər Əliyevin anadan olmasının 100 illiyi tamam olur. Bu iki böyük Türk Liderinin davamçıları olan Rəcəb Tayyib Ərdoğan və İlham Əliyevin tarixi yubileyə ən gözəl töhfəsi elə Türk əsrinin başlanmasıdır.