Azərbaycanın Dövlət Sərhəd Xidməti ilə Türkiyə Jandarma Qüvvələri arasında əməkdaşlıq müzakirə edilib
Noyabrın 14-də Azərbaycan Respublikası Dövlət Sərhəd Xidmətinin (DSX) rəisi - Sərhəd Qoşunlarının komandanı, general-polkovnik Elçin Quliyev ölkəmizdə səfərdə olan Türkiyə Respublikası Jandarma Qüvvələrinin komandanı, ordu generalı Abdullah Atayın rəhbərlik etdiyi nümayəndə heyəti ilə görüşüb.
DSX aparatında Türkiyə nümayəndə heyətinin qarşılanması münasibətilə fəxri qarovul düzülüb və qonaqların gəlişi hərbi orkestrin müşayiəti ilə təşkil olunub.
Dövlət Sərhəd Xidmətinin mətbuat mərkəzindən AZƏRTAC-a bildiriblər ki, general-polkovnik Elçin Quliyev xidmətin nümayəndə heyətinin üzvlərini ordu generalı Abdullah Ataya təqdim edib.
Görüşdə Elçin Quliyev dövlətlərarası qarşılıqlı münasibətlərin dinamik inkişafı və möhkəmləndirilməsi məsələlərinə zamanında dahi öndər Heydər Əliyevin, hazırda isə Azərbaycan Prezidenti, Silahlı Qüvvələrin Ali Baş Komandanı İlham Əliyevin xüsusi önəm verdiyini vurğulayaraq Azərbaycan Silahlı Qüvvələrinin, sərhəd mühafizəsinin inkişafı üçün Türkiyənin Silahlı Qüvvələri, o cümlədən Jandarm Komandanlığı ilə qarşılıqlı münasibətlərin xüsusi əhəmiyyət kəsb etdiyini bildirib.
Söhbət zamanı Ermənistan-Azərbaycan, Dağlıq Qarabağ münaqişəsi nəticəsində Azərbaycan ərazisinin 20 faizinin, eləcə də Azərbaycan - İran dövlət sərhədinin 132 kilometrinin işğal altında olması, bu ərazilərdən qaçaqmalçılıq və digər qeyri-qanuni məqsədlərlə istifadə edilməsi, Azərbaycan sərhəd mühafizəsi sisteminin təşkili, DSX-nin təyinatı və tapşırıqları, həyata keçirilən islahatlar və əldə olunan nailiyyətlər barədə qonağa məlumat verilib, qarşılıqlı əməkdaşlığın vəziyyəti və perspektivlərinə dair fikir mübadiləsi aparılıb.
Müzakirələr zamanı ikitərəfli əlaqələrin səviyyəsi yüksək qiymətləndirilib və qarşılıqlı faydalı əməkdaşlığın daha da genişləndirilməsinin zəruriliyi qeyd olunub.
Bölmənin digər xəbərləri
