MƏDƏNİYYƏT
Azərbaycanın Mədəniyyət və Turizm Nazirliyi ilə Dünya Turizm Təşkilatı birgə layihə həyata keçirəcəklər
Bakı, 12 aprel (AZƏRTAC). Aprelin 12-də Azərbaycanın Mədəniyyət və Turizm Nazirliyi və Dünya Turizm Təşkilatı (DTT) arasında kulinariya, mədəniyyət və turizm üzrə Beynəlxalq konfransın təşkilinə dair saziş imzalanmışdır.
AZƏRTAC xəbər verir ki, sazişi Azərbaycanın mədəniyyət və turizm naziri Əbülfəs Qarayev və DTT-nin şöbə müdiri Alla Peresolova imzalamışlar.
Tədbirdə çıxış edən Ə.Qarayev bu layihənin beynəlxalq təşkilatla birgə həyata keçirilən ilk tədbir olduğunu bildirmişdir. Qeyd etmişdir ki, layihə Prezident İlham Əliyevin apardığı uğurlu siyasət nəticəsində Azərbaycana artan marağın təzahürüdür və ölkəmizin beynəlxalq aləmdə tanınması, Dünya Turizm Təşkilatı ilə əlaqələrimizin genişlənməsi baxımından mühüm əhəmiyyət kəsb edir.
Tədbirdə Alla Peresolova Azərbaycan kulinariyasının zənginliyindən danışmışdır. Qonaq bildirmişdir ki, Azərbaycanın beynəlxalq İpək Yolunun üzərində yerləşməsi bu layihənin həyata keçirilməsinin əhəmiyyətini daha da artırır.
Sazişə əsasən, bu il sentyabrın 6-7-də Bakıda “İpək Yolunun dadı” adlı layihə reallaşacaqdır.