Nazirliyin mətbuat xidmətindən AZƏRTAC-a bildirmişlər ki, nümayəndə heyətini Vaşinqtonun “Dallas” Beynəlxalq Hava Limanında ölkəmizin ABŞ-dakı səfiri Hafiz Paşayev, ABŞ müdafiə nazirinin Avrasiya məsələləri üzrə müavini Cim Makduqal və digər rəsmi şəxslər qarşılamışlar.

Martın 21-də general–polkovnik Səfər Əbiyev və nümayəndə heyəti Florida Ştatının Tampa şəhərində yerləşən ABŞ Silahlı Qüvvələri Mərkəzi Komandanlığına gəlmişdir. Burada onu Mərkəzi Komandanlığın qərargah rəisi, general–mayor Stiven Uitkomb qarşılamış və brifinq keçirilmişdir. General-mayor Stiven Uitkomb Azərbaycanın beynəlxalq koalisiyaya verdiyi töhfəyə görə ölkəmizin müdafiə nazirinə təşəkkür etmiş və Mərkəzi Komandanlığa ezam olunmuş Azərbaycan Silahlı Qüvvələri nümayəndəsinin fəaliyyətini müsbət qiymətləndirmişdir.

Martın 22-də general–polkovnik Səfər Əbiyev ABŞ Silahlı Qüvvələrinin Xüsusi Əməliyyat Qərargahının Komandanı general Brayan Brounla görüşmüşdür. General Brayan Broun təmsil etdiyi sahə haqqında ətraflı məlumat vermiş, Azərbaycan Hərbi Dəniz Qüvvələrinin ABŞ Hərbi Dəniz Qüvvələri ilə birgə keçirilən treninqləri yüksək qiymətləndirmiş və gələcəkdə belə tədbirlərin davam etdirilməsinin əhəmiyyətini xüsusi vurğulamışdır.

Həmin gün Texas Ştatının San-Antonio şəhərində yerləşən Xarici Dillər İnstitutuna gələn general–polkovnik Səfər Əbiyev Azərbaycan Silahlı Qüvvələrinin institutda təhsil alan dinləyici zabitlərinin vəziyyəti ilə maraqlanmışdır.

Müdafiə naziri ABŞ Hərbi Hava Qüvvələrinin Təlim–Tədris Mərkəzinin vitse–prezidenti, general–leytenant Con Xopperlə görüşü zamanı Azərbaycan və ABŞ təhsil sistemi və bu sahədə əməkdaşlığın əhəmiyyəti haqqında fikir mübadiləsi aparmışdır.

Martın 23-də nazir Səfər Əbiyev Oklahoma Ştatının Tulsa şəhərində yerləşən Milli Qvardiyanın 138-ci aviasiya eskadrilyasında bu ştatın Milli Qvardiyasının komandanı, general–mayor Qarri Vayatla görüşmüş, F-16 döyüş təyyarəsi ilə tanış olmuş və onun uçuşuna baxmışdır.

Ehtiyatda olan hərbi qulluqçuların “Kemp Qruber” hazırlıq bazasına gələn və bazanın fəaliyyəti ilə tanış olan general-polkovnik Səfər Əbiyev Oklahoma Siti şəhərində qubernator Bred Henri və konqresmenlərə Cənubi Qafqaz regionunda hərbi-siyasi vəziyyət, Azərbaycanın Müdafiə Nazirliyi və Oklahoma Ştatının Milli Qvardiyası arasında əməkdaşlıq planları barədə məlumat vermişdir.

Həmin gün Oklahoma Ştatının Milli Qvardiya Regional Hazırlıq İnstitutu ilə tanışlıq keçirilmiş və tərəfdaşlıq proqramı çərçivəsində əməkdaşlıq məsələləri müzakirə edilmişdir.

Martın 24-də nümayəndə heyəti Nyu-York şəhərinə gəlmişdir. Burada general-polkovnik Səfər Əbiyev Birləşmiş Millətlər Təşkilatının Baş katibinin Sülhməramlı Əməliyyatlar üzrə yardımçısı Hadi Ənnabi ilə görüşmüşdür. Hadi Ənnabi Azərbaycan Silahlı Qüvvələrinin sülhməramlı fəaliyyətini yüksək qiymətləndirmiş, BMT-nin Azərbaycandan olan beynəlxalq müşahidəçilərinin Finlandiyada hazırlanmasına yardım göstəriləcəyinə vəd vermişdir.

Respublikamızın müdafiə naziri Ermənistanın Azərbaycana təcavüzü, onun BMT-nin Dağlıq Qarabağ münaqişəsinə dair çıxardığı 4 qətnaməni yerinə yetirməməsi, ölkəmizə qarşı törətdiyi terror aktları, işğal altında olan ərazilərdə külli miqdarda nəzarətsiz silah-sursatın toplanması barədə məlumat vermişdir.

Martın 25-də Vaşinqton şəhərinə gələn nazir Səfər Əbiyev burada ABŞ Konqresində Oklahoma Ştatından olan konqresmenlər Frenk Lukas, Tom Kol, Silahlı Qüvvələr üzrə Komitənin sədr müavini Kert Veldon və komitənin üzvü Ceyms Qibbonsla keçirdiyi görüşlər zamanı Ermənistanın işğalçılıq siyasətinin nəticələri, Azərbaycanın enerji layihələri, Ermənistan-Azərbaycan münaqişəsinin həll olunmaması ilə əlaqədar bu layihələrin həyata keçirilməsinə qarşı təhlükələrin mövcud olduğu barədə və digər məsələlər ətrafında müzakirələr aparılmışdır.

Konqresmenlər Qibbons və Veldon bu məsələdə Azərbaycanın mövqeyini qətiyyətlə dəstəkləmişlər. Konqresmen Veldon Azərbaycanı dəstəkləmək məqsədi ilə “Kokas” fraksiya qrupunun yaradılması təşəbbüsü və ABŞ konqresinin 19 nəfərdən ibarət nümayəndə heyətinin 2004-cü il aprel ayının əvvəlində Bakıya səfəri barədə məlumat vermişdir.

Martın 26-da general-polkovnik Səfər Əbiyevin rəhbərlik etdiyi nümayəndə heyəti Arlinqton Milli Qəbiristanlığında Naməlum Əsgərin məzarına əklil qoymuşdur.

Sonra ABŞ-ın müdafiə naziri Donald Ramsfeldlə rəsmi görüş olmuşdur. Azərbaycanın müdafiə naziri, general-polkovnik Səfər Əbiyev amerikalı həmkarı Donald Ramsfeldə səfərinin gedişi, konqresmenlərlə görüşü, Azərbaycan-ABŞ ikitərəfli əməkdaşlığının vəziyyəti, Cənubi Qafqaz regionunda hərbi-siyasi durum, Xəzərdə təhlükəsizlik, Ermənistan tərəfindən NATO-nun “Sülh naminə tərəfdaşlıq” proqramının Çərçivə Sənədinin əsas prinsiplərindən biri olan bir-birinin ərazi bütövlüyünə hörmət və dövlət sərhədlərinin toxunulmazlığı prinsipinin yerinə yetirilməməsi, BMT Təhlükəsizlik Şurasının qətnamələrinə əməl etmədiyinə görə, Ermənistana təzyiq göstərilməsinin vacibliyi, Azərbaycanın NATO ilə əməkdaşlığı, “Kooperativ Best Effort-2004” təlimlərinə hazırlığın gedişi haqqında məlumat vermişdir. Müdafiə naziri ABŞ hərbi təhsil müəssisələrində Azərbaycan zabitlərinin təhsil almasına şərait yaratdığına görə həmkarına təşəkkürünü bildirmişdir.

ABŞ-ın müdafiə naziri Donald Ramsfeld general-polkovnik Səfər Əbiyevi səmimiyyətlə salamlayaraq, beynəlxalq terrorizmlə mübarizədə ABŞ-ı dəstəklədiyinə, eləcə də İraqda beynəlxalq koalisiyaya göstərdiyi yardıma görə, Azərbaycana təşəkkür etmiş, iki dövlətin Silahlı Qüvvələri arasında əməkdaşlığın gedişini və perspektivlərini yüksək qiymətləndirmiş, Azərbaycanın müdafiə nazirinin konqresmenlərlə görüşünün əhəmiyyətini vurğulamış, Ermənistan-Azərbaycan münaqişəsinin mərhələli həlli fikri ilə razı olduğunu və bu prosesin sürətləndirilməsinin zəruriliyini bildirmişdir.

Həmin gün general-polkovnik Səfər Əbiyev ABŞ Dövlət katibinin siyasi məsələlər üzrə müavinləri Mark Qrossman və Linn Pasko ilə görüşündə Azərbaycan-ABŞ ikitərəfli əməkdaşlığı, Cənubi Qafqaz regionunda hərbi-siyasi vəziyyət, Ermənistan-Azərbaycan münaqişəsinin həllində işğalçı tərəfin destruktiv mövqeyi və digər məsələlər müzakirə olunmuşdur.

ABŞ Prezidentinin milli təhlükəsizlik məsələləri üzrə müşavirinin müavini Stefan Xedli ilə görüşdə isə ABŞ-Azərbaycan ikitərəfli əməkdaşlığı, Azərbaycanın sülhməramlı əməliyyatlarda iştirakı, Azərbaycanın NATO ilə əməkdaşlığı, Azərbaycanın enerji layihələri, Ermənistan-Azərbaycan, Dağlıq Qarabağ münaqişəsi və “Xəzərin təhlükəsizliyi” proqramı haqqında məsələlərə toxunulmuşdur.

Görüşdə Avrasiya Departamentinin rəhbəri, səfir Daniel Frid iştirak etmişdir.

Müdafiə naziri Səfər Əbiyevin rəhbərlik etdiyi nümayəndə heyəti martın 28-də Vətənə qayıtmışdır.