MƏDƏNİYYƏT
Azərbaycanın müqəddəs məkanı olan Şuşa şəhərinin dirçəlişi istiqamətində çox işlər görülməlidir
![Azərbaycanın müqəddəs məkanı olan Şuşa şəhərinin dirçəlişi istiqamətində çox işlər görülməlidir](/files/2023/3/1200x630/16972855795535713251_1200x630.jpeg)
Şuşa, 14 oktyabr, Gülay Nəzərova, AZƏRTAC
Bu, Azərbaycana ilk gəlişimdir. Şuşa şəhəri, onun unikal təbiət landşaftı çox xoşuma gəldi. Biz burada böyük işlər görüldüyünün şahidi olduq, amma Azərbaycan hökuməti ölkənin müqəddəs məkanı olan Şuşa şəhərinin dirçəlişi istiqamətində çox işlər görməlidir və əlbəttə, bu, Türk dünyasının digər ölkələri ilə əməkdaşlıq və qarşılıqlı fəaliyyət şəraitində edilməlidir.
Bu barədə AZƏRTAC-a müsahibəsində Kazan Federal Universitetinin müəllimi İlzira Kuzmina bildirib. O, Şuşada keçirilən Birinci Türk Dünyası Mədəniyyət Forumunun panel iclasında “Volqa-Ural regionunun Türk irsinin qorunub saxlanılması üzrə təcrübəsi” mövzusunda məruzə ilə çıxış edib.
Rusiyanın Volqa-Ural regionunda yerləşən Kazan, Bulqar, Bilyar, Suvar və Cuketau şəhərlərində çoxlu türk-müsəlman abidələrinin olduğunu qeyd edən İlzira Kuzmina əlavə edib: “Bu şəhərlərdə unikal arxeoloji abidələr, o cümlədən İslam və türk sivilizasiyalarının orta əsrlərə aid memarlıq nümunələri günümüzə qədər gəlib çıxıb”.
Birinci Türk Dünyası Mədəniyyət Forumunda iştirakından danışan qonaq qeyd edib ki, plenar iclas çox maraqlı olub. “Başqa ölkələrdən gəlmiş qonaqlar çıxış etdilər, türk xalqlarının irsi və türk sivilizasiyası abidələri layiqincə təqdim olundu. Mənə Forumda iştirak etmək imkanı verdiklərinə görə yüksək səviyyədə keçirilən tədbirin təşkilatçılarına təşəkkürümü bildirmək istəyirəm”, - deyə İlzira Kuzmina sözlərinə yekun vurub.