Azərbaycanın Qırğız Respublikasındakı səfirliyində Zəfər Günü qeyd edilib
Bakı, 10 noyabr, AZƏRTAC
Azərbaycanın Qırğız Respublikasındakı səfirliyi Zəfər Günü münasibətilə qəbul təşkil edib. Tədbir iştirakçıları - bir sıra dövlətlərin səfirləri, Qırğız Respublikasının Xarici İşlər Nazirliyinin nümayəndələri, bu qardaş ölkənin siyasi və ictimai xadimləri, Azərbaycan diasporunun və Qırğız ictimaiyyətinin tanınmış nümayəndələri Azərbaycan xalqını Zəfər Günü münasibətilə təbrik ediblər.
AZƏRTAC xəbər verir ki, bu barədə “Veçerniy Bişkek” qəzetinin müxbiri Nina Niçiporovanın məqaləsində bəhs edilir.
Materialda vurğulanır ki, Azərbaycan xalqı, qəlbində Vətənə sonsuz sevgi hissləri olan azərbaycanlılar Planetin hansı guşəsində yaşamalarından asılı olmayaraq bu böyük bayramı - Zəfər Gününün ikinci ildönümünü təntənəli şəkildə qeyd edərək, bütün dünyaya sübut ediblər ki, Qarabağ Azərbaycandır.
Azərbaycanın Qırğız Respublikasındakı fövqəladə və səlahiyyətli səfiri Lətif Qəndilov qeyd edib ki, rəşadətli Azərbaycan Ordusu Prezident, Müzəffər Ali Baş Komandan İlham Əliyevin rəhbərliyi ilə 44 gün ərzində “Dəmir yumruğ”un sarsıdıcı zərbəsi ilə torpaqlarımızın 30 illik işğala son qoyub, beləliklə beynəlxalq hüququ və tarixi ədaləti bərpa edib.
Zalda 44 günlük Vətən müharibəsindən bəhs edən fotosərgi təşkil olunub. Fotoşəkillərdə müharibə dövründə düşmən tərəfindən raket atəşlərinə məruz qalmış dinc şəhərlərin və kəndlərin xarabalıqları təsvir edilib. Ekranda Zəfər Paradından, bayram əhval-ruhiyyəli Bakı küçələrindən çəkilmiş videoçarxlar, insanların təbəssüm saçan simaları nümayiş etdirilib.
Diplomat deyib: “Biz ölkəmizin müstəqilliyini və bütövlüyünü ləyaqətlə müdafiə etməyə, hərbi əməliyyatlar şəraitində istənilən məsələni yerinə yetirməyə qabil olan müasir ordu yaratmışıq. Zəfərlə başa çatmış Vətən müharibəsi bunu əyani şəkildə nümayiş etdirdi. Azərbaycan Ordusu ölkənin Prezidenti, Ali Baş Komandan İlham Əliyevin rəhbərliyi ilə dəmir yumruq kimi birləşərək döyüşlərdə yüksək ustalıq nümayiş etdirdi və torpaqlarımızın illərlə davam etmiş işğalına son qoydu. Bizim rəşadətli əsgər və zabitlərimizin misilsiz mərdliyi, igidliyi və fədakarlığı sayəsində Azərbaycan qalib dövlət, Azərbaycan xalqı isə qalib xalq oldu. Biz qalib gəldik, çünki biz haqlıyıq. Həqiqət isə, məlum olduğu kimi, güc deməkdir”.
Lətif Qəndilov bu Zəfərin qazanılması uğrunda canlarından keçmiş şəhidlərin, yaralanmış və əlil olmuş şəxslərin müstəsna xidmətlərini vurğulayaraq əlavə edib ki, onların göstərdiyi rəşadət heç vaxt unudulmayacaq. Səfir vurğulayıb: “İşğaldan azad edilmiş əzəli Azərbaycan torpaqlarında praktiki olaraq bütün tarixi abidələr məhv edilib, yaşayış evləri xarabalıqlara çevrilib. Demək olar ki, bütün məscidlər dağıdılıb və murdarlanıb. Xarici diplomatlar orada gördüklərini XXI əsrin Xirosiması adlandırıblar”.
L.Qəndilov tədbirin qonaqlarına bu münaqişənin tarixi, onun siyasi və hüquqi aspektləri, Ermənistanın təcavüzü, onun törətdiyi beynəlxalq cinayətlər, o cümlədən Xocalı soyqırımı, Ermənistanın yürütdüyü etnik təmizləmə siyasəti və 2016-cı ilin Aprel döyüşləri, Ermənistanın Azərbaycana yeni ərazi iddiaları, təxribat və təhrikçilik aktları barədə məlumat verib, dost ölkələrin xalqımıza göstərdikləri mənəvi dəstəyə və münaqişənin dinc yolla nizamlanmasında köməyə görə təşəkkürünü bildirib.
Bölmənin digər xəbərləri
