Bakı, 11 fevral, AZƏRTAC

RİA-Novosti agentliyinin saytında Azərbaycan Mədəniyyət və Turizm Nazirliyinin Turizm Departamentinin rəisi Aydın İsmiyevin “Azərbaycanın qonaqlarının çoxu yenə rusiyalılardır” sərlövhəli müsahibəsi dərc edilib.

Müsahibədə qeyd edilir ki, Azərbaycanın qonaqlarının çoxu Rusiya, Gürcüstan, Türkiyə və İrandan olan turistlərdir. A.İsmiyev deyir: “Ölkəmizə əsas turist axını məhz Azərbaycanla həmhüdud ölkələrdən gəlir. Sonrakı yerləri Avropa və Cənub-Şərqi Asiya ölkələri tutur. Azərbaycanın qonaqları arasında ən çoxsaylı qrup Rusiyadan olan turistlərdir. Bunun əsas səbəbi etnik turizmdir, çünki Rusiyada yaşayan, Rusiya pasportları almış soydaşlarımız mütəmadi olaraq Azərbaycana - öz qohumlarına baş çəkməyə və ya tətilə gəlirlər. Azərbaycana hər il təqribən 2,4 - 2,5 milyon əcnəbi turist gəlir. Onlardan 600-800 min nəfəri Rusiyanı təmsil edir”.

Tarixdə ilk Avropa Oyunları dövründə Bakıya gələcək turistlərin sayı barədə sualın cavabında A.İsmiyev deyib: “İnsanlar bu Oyunlara çox böyük maraq göstərirlər. Hətta idmançıları və məşqçiləri nəzərə almasaq belə, həmin dövrdə ölkəmizə turist axınının xeyli artacağını gözləyirik. Bakıda “Eurovision-2012” mahnı müsabiqəsinin final mərhələsi keçirilərkən təkcə ölkənin paytaxtına 50 minə yaxın qonaq gəlmişdi. Onlardan 6-7 mini müsabiqənin iştirakçıları və müxtəlif nümayəndə heyətlərinin üzvləri idi. Belə bir məlumat var ki, mahnı müsabiqəsinin keçirildiyi 15 gün ərzində Azərbaycan sərhədindən keçmiş insanların sayı 103 min nəfər olub, halbuki adi vaxtda bu göstərici 30-40 min nəfər həddində olur”.

A.İsmiyev ölkəmizdə turizmin inkişafı barədə söhbət açaraq deyib: “Azərbaycan iqtisadiyyatı üçün yeni sahə olan turizm təxminən 10 ildir ki, inkişaf edir. Qardaş Türkiyədə turizm sahəsi 1968-ci ildən mövcuddur, bizdə isə Gənclər, İdman və Turizm Nazirliyi yalnız 2001-ci ildə yaradılıb. Sonra, 2006-cı ildə mədəniyyət və turizm sahələrini birləşdirmək istədilər və yeni bir nazirlik - indiki Mədəniyyət və Turizm Nazirliyi yaradılması qərara alındı. İndi biz həm turizm vasitəsilə mədəniyyəti təbliğ edir, həm də mədəniyyətin köməyi ilə turizmi inkişaf etdiririk”.

Departamentin rəisi xatırladıb ki, Azərbaycan hökuməti ölkəmizə gələn qonaqların sayını artırmaq xatirinə viza verilməsi qaydasını sadələşdirib. 2013-cü il martın 15-dən etibarən dünyanın istənilən ölkəsinin vətəndaşı heç bir problemlə üzləşmədən elektron viza rəsmiləşdirə bilər. Dünyanın 55 turizm şirkəti bu xidmət növündən istifadə etmək üçün zəruri kodlar alıb. Fiziki şəxslər isə bu cür vizanı yalnız akkreditə edilmiş turizm şirkəti vasitəsilə ala bilərlər. Həmin şirkət Azərbaycana onun vasitəsilə gələn insanlara görə məsuliyyəti öz üzərinə götürür. Bu cür vizanın qiyməti cəmi 20 dollar, səfirlik vasitəsilə alınan vizanın qiyməti isə 60 dollara yaxındır. Bundan əlavə, ölkəyə gəlmək üçün elektron viza alınması xeyli tez və asan başa gəlir.

A.İsmiyev deyib: “Hesab edirəm ki, 10 il ərzində çox iş görülüb. Bu müddətdə turizm üzrə bütün statistik göstəricilər üç-dörd dəfə artıb. Son iki-üç ildə altı brend otel şəbəkəsi (“Four Seasons”, “Hyatt”, “Kempinski”, “Sheraton”, “Mariott”, “Hilton”) yaradılıb. Biznes sinfinə aid otellər çox sürətlə inkişaf edir. Biz “premium” sinfinə aid otellərə çox ümid bəsləyirik, çünki hesab edirik ki, turizmin inkişafına başlamaq üçün 4 və 5 ulduzlu otellər tikilməlidir. Biznesmenlər və yüksək vəzifəli məmurlar bu cür otelləri görəndən sonra ölkəmizin potensialını qiymətləndirəcək və bu istiqamətin təbliğinə kömək edə biləcəklər”.

Departament rəisi Azərbaycanda qış turizmindən söhbət açaraq bildirib ki, 2012-ci ildə ölkəmizdə ilk dağ xizəyi kurortu - “Şahdağ” yaradılıb. Azərbaycanlıların özlərinin arasında çox populyar olan bu kurort respublika hüdudlarından kənarda da məşhurlaşmağa başlayır. O deyib: “Yeri gəlmişkən, “Şahdağ” - təkcə dağ xizək idmanı kompleksi deyil. Yay vaxtı orada dağlarda piyada, at belində və ya velosipedlə gəzməyi xoşlayan adamlar da istirahət edirlər”.

A.İsmiyev Qəbələ rayonunda yerləşən “Tufandağ” dağ xizək idmanı kompleksindən də söhbət açaraq bildirib: “2014-cü ildə bu kurortun birinci növbəsi istifadəyə verilib. On xizək yolundan beşi və dörd kanat yolu artıq fəaliyyətdədir. “Şahdağ” kompleksində olduğu kimi, burada da bütün dağ-xizək yolları “süni qar” sistemi ilə təchiz olunub”.

A.İsmiyev çimərliklərdə istirahət mövzusuna toxunaraq deyib: “İlk növbədə Xəzər dənizinin sahilində yerləşən “Jumeirah Beach” otel zonasını qeyd etmək istərdim. Bu zonanın özünəməxsus iqlimi kardioloji xəstəliklərdən əziyyət çəkən insanlar üçün çox faydalıdır. Bütün dünyada yeganə “ozon dalğası” burada mövcuddur. Onun sayəsində ürək xəstəlikləri dava-dərmansız, yalnız hava ilə müalicə olunur”.

A.İsmiyevin sözlərinə görə, bir neçə turizm-rekreasiya zonasının sənədləri təsdiq olunmaq üçün Nazirlər Kabinetinə təqdim olunub. Belə zonalardan birincisi Bakının Xəzər sahili boyunca yerləşən ərazidə yaradılacaq geniş turizm zonası olacaq.