Azərbaycanın Qubadlı rayonunun zəngin təbii sərvətləri ermənilər tərəfindən talan edilmişdir
Bakı, 31 avqust (AZƏRTAC). Azərbaycanın Qubadlı rayonunun işğalından 19 il keçir. Sahəsi 80 min 250 hektar olan rayon 1993-cü il avqustun 31-də Ermənistan silahlı birləşmələri tərəfindən zəbt olunmuşdur.
Ekologiya və Təbii Sərvətlər Nazirliyindən AZƏRTAC-a bildirmişlər ki, zəngin yeraltı sərvətlərə və əsrarəngiz təbii gözəlliyə malik olan Qubadlı rayonunun ərazisində müxtəlif növ ağaclardan ibarət 13 min 160 hektar dövlət meşə fondu mövcud idi. Rayonda 150-1600 yaşlı 10-dan artıq iri diametrli ağac təbiət abidəsi kimi qorunurdu.
Dəniz səviyyəsindən 1600 metr yüksəklikdə yerləşən və sahəsi 20 min hektar olan, zəngin flora və faunaya malik Qubadlı Dövlət Təbiət Yasaqlığında nəsli kəsilməkdə olan bir çox heyvan və quş növləri mühafizə olunurdu.
Qubadlı rayonunda Hacılı tuf, Xanlıq kəndində yerləşən gil, Eyvazlı bəzək-əlvan (əqiq) və Həkəri çayı sahilində yeraltı şirin su yataqları var idi.
Rayon ərazisində geniş sahələri əhatə edən qiymətli ağac növlərindən ibarət meşələr, böyük ehtiyata malik yeraltı sərvətlər, mineral maddələrlə zəngin su mənbələri erməni işğalçıları tərəfindən talan olunmuş, özünün qeyri-adi flora və faunası ilə seçilən əsrarəngiz təbiət guşələri dağıdılmış və məhv edilmişdir.
Bölmənin digər xəbərləri
