AZƏRBAYCANIN RUS İCMASI ÖZÜNÜN 15 İLLİYİNİ QEYD EDƏCƏKDİR
AZƏRTAC xəbər verir ki, sentyabrın 23-24-də Azərbaycanın Rus icması (ARİ) özünün 15 illiyini qeyd edəcəkdir.
ARİ-dən AZƏRTAC-a bildirmişlər ki, bayram çərçivəsində “Ruslar Azərbaycan tarixində” kitabının təqdimatı, ARİ Respublika Şurası üzvlərinin respublika rəhbərliyi ilə görüşü planlaşdırılmışdır.
“Azərbaycanın rus icması-15 illik yol” konfransının keçirilməsi, ARİ fəallarının mükafatlandırılması, tələbələrə Moskva meri təqaüdlərinin təqdim edilməsi və Ümumrusiya Azərbaycan Konqresi ilə sazişin imzalanması da nəzərdə tutulmuşdur.
Xatırladaq ki, Azərbaycanın Rus icması 1993-cü il mayın 5-də yaradılmışdır. O vaxtdan bəri Azərbaycan Milli Məclisinin deputatı Mixail Zabelin icmanın əvəzsiz sədridir.
ARİ rus millətinin Azərbaycanda yaşayan təqribən 70 min nümayəndəsini öz sıralarında birləşdirir.
Bölmənin digər xəbərləri
