Azərbaycanın sosial işçiləri Türkiyədə təlim və təcrübə keçmişlər
Bakı, 8 sentyabr (AZƏRTAC). Sentyabrın 8-də “Landmark” hotelində Türkiyədə təlim və təcrübə keçmiş bir qrup azərbaycanlı sosial işçinin qardaş ölkənin müvafiq qurumlarının bu sahədəki fəaliyyəti ilə tanışlığının nəticələrinə həsr olunmuş mətbuat konfransı keçirilmişdir.
AZƏRTAC xəbər verir ki, səfər ABŞ-ın Beynəlxalq İnkişaf Agentliyinin (USAİD) maliyyə dəstəyi ilə Save the Children (Uşaqların Xilası) təşkilatı tərəfindən reallaşan “Dayanıqlı dəyişiklik naminə birgə fəaliyyət” layihəsi çərçivəsində həyata keçirilmişdir.
Təhsil Nazirliyinin, beynəlxalq təşkilatların təmsilçilərinin və KİV nümayəndələrinin iştirak etdikləri konfransda bildirilmişdir ki, səfərin məqsədi Azərbaycandan olan mütəxəssislərin Türkiyənin uşaq müdafiəsi modelini təcrübədə yaxından öyrənmək və bunu ölkəmizdə tətbiq etmək olmuşdur.
Azərbaycanlı mütəxəssislər Ankarada bir sıra müvafiq müəssisələrin fəaliyyəti, qardaş ölkənin uşaq müdafiəsi sahəsində tətbiq etdiyi uğurlu modellə tanış olmuşlar. Onlar, həmçinin əqli cəhətdən əlilliyi olan insanlara göstərilən xidmətlər və həyata keçirilən layihələr barədə də məlumatlandırılmışlar.
Qeyd edilmişdir ki, Türkiyədə təlim və təcrübə keçmiş mütəxəssislər qardaş ölkənin təcrübəsini Azərbaycanda tətbiq etməyə, xüsusi qayğıya ehtiyacı olan ailələrə yüksək keyfiyyətli xidmətlər göstərməyə hazırdırlar.
Sosial işçilər müvafiq sahə üzrə Türkiyə təcrübəsindən danışmışlar.
Sonda suallar cavablandırılmışdır.
Bölmənin digər xəbərləri
