Azərbaycanın strateji mövqeyi Almaniya tərəfindən yüksək qiymətləndirilir RƏY
Bakı, 23 iyul, AZƏRTAC
Azərbaycan ilə Almaniya arasında ikitərəfli tərəfdaşlıq üçün strateji gündəliyə dair Birgə Bəyannamənin imzalanması münasibətlərin gələcək inkişafı baxımından mühüm əhəmiyyət kəsb edir. Azərbaycan Aİ-nin əsas siyasi, iqtisadi və təsir mərkəzi olan Almaniya ilə münasibətlərini strateji gündəlik səviyyəsinə yüksəltdi. Bu isə Azərbaycanın Aİ-nin aparıcı dövlətləri ilə əməkdaşlığının daha da dərinləşməsi və möhkəmlənməsi deməkdir.
Bu fikirləri AZƏRTAC-a açıqlamasında Milli Məclisin deputatı Tural Gəncəliyev deyib.
O bildirib ki, Almaniya ilə Birgə Bəyannamənin imzalanması bəzi Avropa institutlarında ölkəmizə qarşı aparılan qərəzli kampaniyalar fonunda xüsusi siyasi əhəmiyyət daşıyır. Bu sənəd o dövrdə imzalandı ki, bəzi Avropa institutlarında, xüsusilə AŞPA-da və AP-də Azərbaycana qarşı qərəzli kampaniyalar aparılırdı. Prezident İlham Əliyevin Almaniyaya uğurlu səfəri və imzalanan Birgə Bəyannamə həmin kampaniyalara verilmiş ən tutarlı siyasi cavablardan biri oldu.
T.Gəncəliyev vurğulayıb ki, Birgə Bəyannamənin məzmunu Almaniyanın Azərbaycana münasibətində formalaşan yeni baxışı da aydın şəkildə ortaya qoyur.
"Sənəd diqqətlə təhlil olunduqda görünür ki, Almaniya Azərbaycanı artıq yalnız Avropanın enerji təhlükəsizliyinə töhfə verən tərəfdaş kimi deyil, eyni zamanda, tranzit-kommunikasiya marşrutlarının üzərində yerləşən, Böyük Avrasiya regionuna, Cənubi Qafqaza, Xəzər hövzəsinə və Mərkəzi Asiyaya açılan strateji qapı kimi qiymətləndirir. Azərbaycanın geosiyasi və geoiqtisadi mövqeyi bu gün Almaniya və bütövlükdə Avropa İttifaqı üçün xüsusi əhəmiyyət daşıyır. Almaniyanın Azərbaycanla strateji tərəfdaşlığa xüsusi önəm verməsi Aİ-nin hazırda üzləşdiyi çağırışlarla da bağlıdır. Bu gün Aİ enerji, siyasi və hərbi təhlükəsizlik sahələrində ciddi çağırışlarla üz-üzədir. Belə bir şəraitdə Azərbaycan kimi etibarlı və strateji əhəmiyyətə malik ölkə ilə əməkdaşlıq Almaniyanın və Aİ-nin maraqlarına tam cavab verir və onların təhlükəsizlik imkanlarını daha da gücləndirir. Sənəddə siyasi və hərbi təhlükəsizlik sahəsində əməkdaşlığın inkişaf etdirilməsi xüsusi yer tutur. Almaniya dünyanın qabaqcıl müdafiə sənayesi, yüksək texnologiyalar və müasir hərbi konsepsiyaların tətbiq olunduğu ölkələrdən biridir. Bu baxımdan, Azərbaycan üçün yeni texnologiyalara, yeni əməkdaşlıq imkanlarına və yeni bazarlara çıxış perspektivlərinin genişlənməsi də strateji əhəmiyyət daşıyır", – deyə deputat vurğulayıb.
Milli Məclisin üzvü bildirib ki, strateji tərəfdaşlıq hər iki ölkə üçün qarşılıqlı faydalı imkanlar yaradır. Almaniya Azərbaycan vasitəsilə Avrasiya regionuna, o cümlədən Cənubi Qafqaza və Mərkəzi Asiyaya çıxış imkanlarını genişləndirir. Azərbaycan üçün də Almaniya Aİ-nin iqtisadi və siyasi mərkəzinə açılan əsas qapıdır. Strateji münasibətlərin qurulması Azərbaycanın Aİ-yə üzv dövlətlərlə əməkdaşlığının gələcəkdə daha da genişlənməsinə mühüm töhfə verəcək.
“Azərbaycan artıq yalnız enerji təchizatçısı kimi deyil, həm də etibarlı nəqliyyat və kommunikasiya mərkəzi kimi qiymətləndirilir. Ölkəmiz bu gün təkcə enerji təhlükəsizliyində deyil, həm də sabit tranzit-kommunikasiya marşrutları üzərində yerləşən etibarlı tərəfdaş kimi çıxış edir. Bununla yanaşı, Azərbaycan yalnız öz enerji resurslarının deyil, həm də Mərkəzi Asiya dövlətlərinin enerji resurslarının Xəzər dənizi və Cənubi Qafqaz vasitəsilə Avropaya təhlükəsiz şəkildə nəqlində əsas marşrut rolunu oynayır. Bu yanaşma Azərbaycanın Orta dəhlizdəki strateji rolunun Almaniya tərəfindən yüksək qiymətləndirildiyini göstərir.
Azərbaycan ənənəvi neft və qaz ixracı ilə yanaşı, alternativ və bərpaolunan enerji layihələrinin, rəqəmsal kommunikasiya xətlərinin təhlükəsiz tranzitinin təmin edilməsində də mühüm rol oynayır. Bu, eyni zamanda, Orta Dəhlizin tam funksional beynəlxalq nəqliyyat marşrutu kimi inkişafında Azərbaycanın strateji mövqeyinin Almaniya tərəfindən yüksək qiymətləndirilməsinin göstəricisidir", – deyə deputat vurğulayıb.
Müxbir - Səbinə Əlizadə
Bölmənin digər xəbərləri
