AZƏRBAYCANIN TAEKVONDO ÜZRƏ YIĞMA KOMANDASI BRAZİLİYA MİLLİSİNİ 4:1 HESABI İLƏ MƏĞLUB ETMİŞDİR
Bakı, 12 iyun (AZƏRTAC). Azərbaycanın taekvondo üzrə kişilərdən ibarət yığma komandası Bakı İdman Sarayında dünya kuboku turniri çərçivəsində Braziliya millisinə qalib gəlmişdir.
Dayanq üzərinə birinci Samir Aydınov (54 kq) çıxmışdır. O, Mixael Silva ilə qarşılaşmada 7:4 hesabı ilə qələbə qazanaraq yığmamızı hesabda irəli çıxarmışdır -1:0.
Komandamızın uğurlu çıxışını Rövşən Məmmədov (63 kq) və İlkin Şahbazov (72 kq) davam etdirmişdir. R.Məmmədov O.Marçel Ferreyranı 8:4, İ.Şahbazov isə Dioqo Silvanı 10:7 hesabı ilə məğlub etmişdir.
Ramin Əzizov (82 kq) isə Fabritsio Seydlerdən güclü olmuşdur - 6:2 .
Ən yuxarı çəki dərəcəsində (82 kq-dan yuxarı) isə Təvəkkül Bayramov- Marçelino Duqlas dueti ikincinin qələbəsi ilə başa çatmışdır - 10:12.
Beləliklə, Azərbaycan yığması güclü Braziliya millisini 4:1 hesabı ilə məğlubiyyətə uğratmışdır.
İyunun 13-də meydan sahiblərinin növbəti rəqibi İtaliya millisi olacaqdır.
Qeyd edək ki, yığmamızın yer alıdığı F qrupunun digər görüşündə isə Rusiya millisi İtaliya komandasını 3:2 hesabı ilə məğlub etmişdir.
Qadınlardan ibarət milli komandamız isə iyunun 12-də ilk görüşünü Yunanıstan kollektivinə qarşı keçirmişdir. Azərbaycan yığması 3:2 hesabı ilə məğlub olmuşdur.
Qadın taekvondoçularımız növbəti görüşünü Braziliya komandasına qarşı keçirəcəklər.
######
Bölmənin digər xəbərləri
