Azərbaycanın turizm potensialı müxtəlif ölkələrdə silsilə tədbirlərlə təbliğ olunub
Bakı, 25 dekabr, AZƏRTAC
Azərbaycanın turizm potensialının gəlmə turizmi baxımından prioritet sayılan ölkələrdə təbliği, turizm şirkətləri arasında əlaqələrin qurulması, turizm bazarının təhlili və digər məsələlərlə bağlı Mədəniyyət və Turizm Nazirliyi tərəfindən Almaniya, Rusiya və Birləşmiş Ərəb Əmirliklərində müvafiq nümayəndəliklər yaradılıb. Nümayəndəlik funksiyalarını müvafiq ölkədə fəaliyyət göstərən və turizm potensialının təbliğində ixtisaslaşan şirkətlər daşıyır.
Nazirliyin mətbuat xidmətindən AZƏRTAC-a bildiriblər ki, 2014-cü ildə Azərbaycanın turizm potensialının Rusiya turizm bazarında təbliği məqsədilə Mədəniyyət və Turizm Nazirliyi ilə müvafiq ixtisaslaşmış şirkət arasında bağlanmış müqaviləyə əsasən bu ölkədə turizm nümayəndəliyi fəaliyyətə başlayıb və uğurlu təbliğat işləri aparıb.
İşlər çərçivəsində Rusiyanın məşhur “Discovery”, “Vokruq Sveta” və “Qoryaçaya Liniya” jurnallarında ölkəmizə həsr olunmuş məqalələr və reklamlar yerləşdirilib. Həmçinin bu ilin aprel ayında Rusiyanın aparıcı turizm şirkətlərinin nümayəndələrinin Azərbaycana səfəri olub və ikitərəfli görüş keçirilib. Cari ilin iyununda Rusiyanın işgüzar turizm (MİCE) ilə məşğul olan şirkətləri üçün Azərbaycana infotur təşkil olunub. İnfotur çərçivəsində keçirilmiş seminarda Rusiyanın MİCE turizm şirkətlərinin nümayəndələri və Azərbaycan Konqreslər Bürosu üzvləri arasında görüşlər keçirilib.
Əməkdaşlığın nəticəsi olaraq Moskvanın mərkəzi küçələrində 60 reklam lövhəsində Azərbaycana dair reklamlar yerləşdirilib.
Nazirlik tərəfindən ölkəmizin turizm potensialının Almaniyada təbliği məqsədilə də bir sıra işlər görülüb. Əməkdaşlıq çərçivəsində “İMEX” beynəlxalq turizm sərgisi ərəfəsində Frankfurtda şəhərin 62 reklam lövhəsində Azərbaycana dair reklam yerləşdirilib. Həmçinin “İMEX” beynəlxalq turizm sərgisi çərçivəsində işgüzar turizm şirkətləri ilə görüş, Azərbaycan Konqreslər Bürosu tərəfindən ölkəmizin turizm imkanları barədə təqdimat keçirilib.
Bundan əlavə olaraq, “HolidayCheck.com” səyahət saytında Azərbaycanın turizm potensialına dair alman dilində mikrosayt yaradılıb və bu sayt iyulun 16-dan avqustun 20-dək fəaliyyət göstərib. Saytda ölkəmiz haqqında ümumi məlumat, sağlamlıq, günəş və çimərlik, mədəniyyət haqqında məlumatlar yer alıb. Mikrosayta 1 ay ərzində ümumi 719 226 baxış olub. Bundan əlavə facebook sosial şəbəkəsində yaradılmış “Aserbaidschan Tourismus” səhifəsinə daha çox “like” toplamaq məqsədilə sentyabrın 17-dən 30-dək reklam kampaniyası keçirilib. Avqustun 11-dən noyabrın 2-dək yerli əhalinin Azərbaycan haqqında maarifləndirilməsi məqsədilə uduşlu onlayn sorğu keçirilib. Əsas uduş Bakıda 4 günlük pulsuz gecələmə olub.
Bu ilin avqust ayında Almaniyanın 10 aparıcı turizm şirkəti üçün ölkəmizə infotur təşkil olunub. Tədbirin nəticəsində yeni biznes əlaqələri qurulub.
Turizm nümayəndəliyi ilə Azərbaycana tur təklif edən “Dertour” və “Berge&Meer” alman turizm şirkətləri arasında müqavilə imzalanıb. Həmin şirkətlər ölkəmizə turların satılmasını təmin edəcəklər.
Qeyd olunanlarla yanaşı, Almaniyanın 10 nəfərdən ibarət aparıcı KİV nümayəndələri üçün ölkəmizə press-tur təşkil olunub. Press-turun nəticəsi olaraq puriy.de bloqunda, www.gmx.net, www.mortimer-reisemagazin.de, blogstars.travelbook.de, www.gour-med.de saytlarında və RP Online jurnalında ölkəmizə dair məqalələr və video-çarxlar yerləşdirilib.
Bir sıra qarşılıqlı silsilə tədbirlərlə yanaşı, Almaniyadakı turizm nümayəndəliyi ilə Azərbaycan Konqreslər Bürosunun birgə birliyi nəticəsində Almaniyanın “İCJ magazine” və “CİM magazine” jurnallarında ölkəmizin işgüzar turizm potensialına dair reklam səhifələri yerləşdirilib.
2015-ci ilin yanvar ayının sonunda Almaniya KİV-nin və turizm şirkətlərinin nümayəndələrinin Azərbaycanın turizm potensialı, həmçinin, milli mətbəx nümunələri haqqında maarifləndirilməsi məqsədilə kulinariya tədbirinin keçirilməsi planlaşdırılır. Tədbir çərçivəsində aşbaz tərəfindən qonaqların iştirakı ilə ölkəmizin milli yeməkləri hazırlanacaq, daha sonra isə təqdimat mərasimi keçiriləcəkdir.
2015-ci ildə Berlində keçiriləcək “İTB Berlin” beynəlxalq turizm sərgisi çərçivəsində martın 5-də Azərbaycanın milli stendində “Happy hours” tədbirinin təşkili nəzərdə tutulur. Tədbir çərçivəsində nümayəndəliyin əməkdaşları tərəfindən 25 turizm şirkəti təmsilçisinə təqdimat keçiriləcək. Həmçinin sərgidən əvvəl və sərgi çərçivəsində Berlində şəhərin 47 reklam lövhəsində Azərbaycana dair reklamın yerləşdirilməsi üzrə işlər aparılır. Eyni zamanda Almaniyanın 3 şəhərində (Frankfurt, Hamburq, Münxen) “guerilla” kampaniyasının keçirilməsi planlaşdırılır. Kampaniya çərçivəsində 3 şəhərdə olan avtobus, tramvay və metrolarda Azərbaycanın turizminin loqosunu və internet səhifəsini özündə əks etdirən reklam kartları yerləşdiriləcəkdir.
Bununla yanaşı, Birləşmiş Ərəb Əmirliklərində fəaliyyət göstərən nümayəndəlik tərəfindən müvafiq press-relizlərin hazırlanması və göndərilməsi, təqdimatlar, kütləvi informasiya vasitələri ilə işin qurulması, nümayəndəlik tərəfindən ərəb dilli www.ourazerbaijan.com saytının inkişaf etdirilməsi, BƏƏ-nin turizm sənayesi nümayəndələri ilə görüşlərin təşkili, Azərbaycan rəmzləri ilə suvenirlərin sifariş olunması və paylanması və digər tədbirlər həyata keçirilib. Belə ki, cari ildə “Travel Trendz”, “Al Manara” və “Tasamim” jurnallarında “Şahdağ” Qış-Yay Turizm Kompleksi haqqında məqalələr yerləşdirilib. Nümayəndəlik tərəfindən “Bakı” və “Qəbələ” adlı yeni broşür hazırlanıb. “Etihad Airways” və “Gulfnews.com” saytlarında ölkəmizin turizm potensialına, həmçinin Azərbaycan Konqreslər Bürosunun fəaliyyətinə dair məqalələr yerləşdirilib. “Pico İnternational” və “Neovii Biotech” şirkətləri üçün ölkəmizə öyrədici səfər təşkil olunub.
Turizm nümayəndəlikləri vasitəsilə ölkəmizin turizm potensialının təbliğ edilməsi turizmin marketinqinin ən effektiv vasitələrindən biridir.
Bölmənin digər xəbərləri
