SİYASƏT
AZƏRBAYCANIN UĞURLARI YÜKSƏK QİYMƏTLƏNDİRİLMİŞDİR
18-dən 22-dək Parisdə YUNESKO-nun iqamətgahında bu beynəlxalq təşkilatın İnsan və biosfer proqramının beynəlxalq əlaqələndirmə Şurasının növbəti iclası keçirilmişdir.
Azərbaycan Milli Elmlər Akademiyasının həqiqi üzvü, insan və biosfer Milli Komitənin sədri Urxan Ələkbərov iclasda iştirak etmişdir. O, AZƏRTAC-ın müxbiri ilə söhbətində demişdir:
-30 ilə yaxındır ki, YUNESKO İnsan və biosfer proqramını həyata keçirir. Bu, ətraf mühitin qorunmasına və insanın davamlı inkişafına yönəldilmiş proqramdır. Proqramın beynəlxalq əlaqələndirmə Şurasına keçmiş SSRİ respublikalarından yalnız Azərbaycan daxildir. İldə, yaxud iki ildən bir Şuranın iclası keçirilir, dünyanın müxtəlif ölkələrində bu sahədə görülmüş işlər müzakirə olunur. Builki iclasda bir çox məsələlərlə yanaşı, ekoloji vəziyyət və milli hesabatlar barədə çıxışlar da dinlənilmişdir. Mən məruzəmdə bu sahədə respublikamızda xeyli iş görüldüyünü açıqladım. Ölkəmizin Prezidenti tərəfindən ötən il fərmanlar verildiyini və bunların insanın davamlı inkişafına istiqamətləndirildiyini xüsusi vurğuladım. Keçən illərdə olduğu kimi, indi də respublikamızın əldə etdiyi uğurlar iclasın təşkilatçıları və iştirakçıları tərəfindən yüksək qiymətləndirildi.
Əsgər Əliyev
AZƏRTAC-ın xüsusi müxbiri
PARİS