Azərbaycanın Xocalı şəhərində günahsız uşaqlara, qadınlara və qocalara qarşı xüsusi amansızlığın izahı yoxdur
Bakı, 24 fevral, AZƏRTAC
İsrailin Netanya Şəhər Mədəniyyət Evində “Xocalı fəryadı qəlbimizi göynədir” adlı tədbir keçirilib. İsrailin Cənubi Qafqaz Araşdırmaları Assosiasiyasının təşkil etdiyi tədbir Azərbaycanın Xocalı şəhərində kütləvi qırğının 23-cü ildönümünə həsr edilib.
AZƏRTAC xəbər verir ki, Netanya Mədəniyyət Evinin səhnəsində 23 il əvvəl erməni faşistlərinin Azərbaycanın Xocalı şəhərinin sakinlərinə qarşı törətdikləri soyqırımı aktının tarixi kadrları yerləşdirilib. Tədbirdə Knessetin deputatları, alimlər, aparıcı politoloqlar, Türkiyə, Qazaxıstan, Bosniya və Herseqovina, Özbəkistan və Şimali Kipr Türk Cümhuriyyətinin İsraildə akkreditə olunmuş diplomatik missiyalarının başçıları iştirak ediblər.
“Xocalıda kütləvi qırğın: bəşəriyyət əleyhinə cinayət” devizi ilə keçirilən görüşün əvvəlində çox təsirli bədii hissə olub. Qeyri-peşəkar gənc aktyorlar Sara Mirzəyeva, Sadıq Mirzəyev, Fuad Mirzəyev, Aynur Hidayətova, Elkin Hidayətov, Nurlan Hidayətov, Könül Əliyeva, Araz Mirzəyev, Əli Əliyev xüsusi amansızlıqla qətlə yetirilmiş, daha sonra meyitləri təhqir edilmiş xocalıların həyatının son dəqiqələrini böyük həssaslıqla canlandırıblar. Meyitlərin çoxunun başında güllə yaraları olub, bu da o müdhiş gecədə yaralılara aman verilmədiyini göstərir. Xocalıda kütləvi qırğının bütün dəhşətləri tədbir iştirakçılarının gözü qarşısında canlandırılıb və onları şoka salıb.
Tədbiri görüşün təşəbbüskarlarından biri Səadət Şükürova açaraq 1992-ci ildə Xocalıda törədilən kütləvi qırğın ilə bağlı dərin kədərini bildirib: “Biz bu gün bura Azərbaycanın Xocalı şəhərində amansızlıqla məhv edilmiş dinc sakinlərin xatirəsini anmağa toplaşmışıq. Təəssüf ki, hələlik dünyanın bu faciə barədə məlumatı azdır və biz öz tərəfimizdən mümkün olan hər şeyi etməliyik ki, dünya Xocalıdakı qanlı qətliamdan xəbər tutsun”.
Sonra “Xocalı fəryadı qəlbimizi göynədir” sənədli filmi nümayiş etdirilib. Bu film Azərbaycan xalqının yaşadığı qanlı faciəni ilk dəfə eşidən israilliləri şoka salıb.
İsrailin Cənubi Qafqaz Araşdırmaları Assosiasiyasının sədri, Hayfa Universitetinin doktorantı, beynəlxalq münasibətlər sahəsində ekspert Arye Qut Xocalıda kütləvi qırğın barədə sənədli təqdimatla çıxış edərək deyib: “Xocalıda misli görünməmiş vəhşilik və amansızlıqla törədilən soyqırımı aktı XX əsrin ən dəhşətli faciələrindən biridir. Bu kütləvi qırğının qorxunc və müdhiş səhnələri Azərbaycanın ürəyində sağalmaz yara olaraq qalacaq. Erməni silahlı qüvvələrinin və muzdlu dəstələrinin şəhəri və ətraf yerləri tərk etməyə macal tapmamış xocalılıların heç birinə aman verməməsi artıq tarixi faktdır. Erməni silahlı birləşmələrinin vəhşiliyi nəticəsində 613 nəfər qətlə yetirilib, 487 adam əlil olub, 1275 dinc sakin, o cümlədən qocalar, uşaqlar və qadınlar əsir düşüb və misli görünməmiş əzablara, təhqirlərə və həqarətlərə məruz qalıb. Bu faciə bütün bəşəriyyətə qarşı yönələn cinayətdir”.
A.Qutun sözlərinə görə, sanballı faktlar, çoxsaylı müstəqil mənbələr, şahid ifadələri təsdiq edir ki, Xocalı şəhərinin mülki əhalisi təkcə azərbaycanlı olduqları üçün bilərəkdən kütləvi şəkildə məhv edilib. İsrailli politoloq deyib: “Xocalı şəhəri Azərbaycan ərazilərinin işğal edilməsinin və burada etnik təmizləmə siyasəti aparılmasının, təlaş və vahimə mühitinin yaradılmasının növbəti mərhələsi olub. Günahsız uşaqlara, qadınlara və qocalara münasibətdə xüsusi amansızlığın heç bir izahı yoxdur. Hazırda Ermənistanda yüksək vəzifələr tutan Seyran Ohanyan, Serj Sarkisyan, habelə Robert Koçaryan və başqaları bu soyqırımı aktının təşkilatçıları kimi beynəlxalq məhkəmə qarşısına çıxmalıdırlar. Cinayət cəzasız qalmamalıdır. Dünya ictimaiyyəti hərbi-siyasi təcavüzə görə Ermənistana ittihamlar irəli sürməlidir.
Knessetin Repatriasiya, Absorbsiya və Diaspor Məsələləri Komissiyasının sədri Yoel Razvozov Xocalıda kütləvi qırğının 23-cü ildönümü ilə əlaqədar Azərbaycan xalqına başsağlığı verərək deyib: “Azərbaycan dilini bilməsəm də bu gün bu tamaşaya baxanda Azərbaycanın Xocalı şəhərində kütləvi qırğının mahiyyətini dərindən hissi etdim və başa düşdüm. Bu hadisənin XX əsrin sonlarında baş verdiyinə inanmaq olmur. Bu qorxunc fotoşəkilləri görəndə, bu yaxınlarda Knessetin nümayəndə heyətinin tərkibində Osvensim ölüm düşərgəsinə səfərimi xatırladım. İndi Xocalıda kütləvi qırğının videokadrları məni sarsıtdı və şoka saldı. Günahsız uşaqlara, qadınlara və qocalara münasibətdə xüsusi amansızlığın izahı yoxdur. Fotoşəkillərdə və videofilmdə gördüklərim, uşaqların, qadınların və qocaların qətli qəddarlıq və vəhşilikdir. Bu dəhşətli faciə heç vaxt unudulmamalıdır. Mən Xocalı xatirəsinə həsr olunmuş bu gecəyə görə sizə təşəkkür edirəm. Azərbaycanlılar yəhudiləri həmişə qardaş biliblər. Bu gün müasir və qüdrətli Azərbaycan multikulturalizm və tolerantlıq nümunəsidir. Bu gün biz Xocalı dəhşətini yaşamış qardaş Azərbaycan xalqının ağrı-acısına kədərlənirik və onun dərdinə şərik oluruq. Bundan sonra da belə olacaq”.
Sonda yaradıcılığının bir hissəsini bu dəhşətli cinayətin qurbanlarının xatirəsinə həsr etmiş şairə, İsrail Yazıçılar İttifaqının üzvü Batsion Abramava Xocalı soyqırımı mövzusunda şeirlərini oxuyub.
Bölmənin digər xəbərləri
