Azərbaycanın yeniyetmə və gənc karateçiləri dünya çempionatında mübarizəyə qoşulublar
Tenerife, 26 oktyabr, AZƏRTAC
Yeniyetmə və gənclərdən ibarət karate üzrə Azərbaycanın milli komandasının üzvləri İspaniyada keçiriləcək dünya çempionatında mübarizə aparırlar.
AZƏRTAC xəbər verir ki, çempionatın ilk günündə idmançımız Roman Heydərov çıxış edib. O, ilk rəqibi Cənubi Afrika Respublikasından olan Silvo Biagioniyə 5:0 hesabı ilə qalib gəlib. İkinci görüşdə isə idmançımızın rəqibi çinli Don Lonq Çin Vonq olub. Roman Heydərov yenə ilk görüşdəki hesabla qalib gəlib. Üçüncü görüşdə isə mərakeşli idmançı Məhəmməd Sedrauyiyə 1:4 hesabı ilə məğlub olan karateçimiz rəqibi finala çıxmadığından mübarizəni medalsız başa vurub.
Yarışlar oktyabrın 28-dək davam edəcək və daha 11 idmançımız qüvvəsini sınayacaq.
İlk günün nəticələrinə əsasən, 11 ölkə idmançıları müxtəlif medallar qazana bilib. İlk üçlükdə Yaponiya, İspaniya, Türkiyədir. Ümumilikdə çempionatda 109 ölkədən 1710 karateçi iştirak edir.
Aygün Əliyeva
AZƏRTAC-ın xüsusi müxbiri
Tenerife
Bölmənin digər xəbərləri
