Azərbaycanın Zəfəri Türk dünyasında birliyin və həmrəyliyin gücləndirilməsi işində əhəmiyyətli rol oynayıb
Bakı, 13 noyabr, AZƏRTAC
Türkdilli Dövlətlərin Əməkdaşlıq Şurası İstanbulda keçirilən VIII Zirvə Görüşündən sonra institusional dəyişiklik edilərək Türk Dövlətləri Təşkilatı adlandırılacaq. Bu dəyişiklik sadəcə məzmun baxımından deyil, həm də yaradılan geniş imkanlar, ümumi maraqlar nəzərə alınaraq mühüm qərarların həyata keçirilməsində, sinxron addımların atılmasında mühüm rol oynayacaq. Belə ki, mövcud fakt beynəlxalq təşkilatlarla əlaqələrinin genişlənməsinə, onun fəaliyyət arealının qlobal əhəmiyyət kəsb etməsinə mühüm təsir edəcək amildir.
Bu sözləri AZƏRTAC-a açıqlamasında politoloq Şəbnəm Həsənova deyib.
Azərbaycanın Vətən müharibəsində Qələbə qazanması ilə tarixi qərarların alınmasına yol açıldığını qeyd edən politoloq deyib: “Zəngəzur dəhlizinin işə salınması ilə türk dövlətləri arasında fəaliyyət istiqaməti genişlənəcək, daha da şaxələnəcək ki, bu da sadəcə siyasi baxımdan deyil, həm də tarixi və soykökümüzə dönüş baxımından olduqca mühüm əhəmiyyət kəsb edən bir məsələdir. Azərbaycan regionda elə bir geosiyasi dəyişikliyə imza atıb ki, zamanında xəyal kimi görünən məsələlər bu gün artıq reallıqdır.
Son illərdə Azərbaycanın haqq davası olan Qarabağ məsələsində, həm də əsrlər boyu digər məsələlərdə xarici dairələrin milli kimliyimizə, əqidəmizə, dini inancımıza sərgilədiyi haqsız və sərt mövqe Azərbaycan və Türkiyənin, məhz Prezident İlham Əliyevin və Prezident Rəcəb Tayyib Ərdoğanın son illərdə sinxron şəkildə atdığı addımların daha da sürətləndirilməsini şərtləndirdi. Bu baxımdan türk dünyasının iki dahi lideri türk təşkilatının coğrafiyasını genişləndirmək məqsədilə Mərkəzi Asiyada yerləşən türk dövlətlərini də öz soykökündən uzaq düşməmək, vahidliyimiz, bütövlüyümüz və bütünlüyümüz olan türkçülüyümüz ətrafında daha sıx birləşmək məsələsində qətiyyətli addımlar atdılar. Bu istiqamətdə Bakıda keçirilmiş VII Zirvə Görüşündə Özbəkistanın Türk Şurasına üzv olmasını olduqca müsbət və sevindirici amil hesab etmək olar”.
Malik olduğumuz ortaq soy-kök, tarix, mədəniyyət və milli dəyərlərdən danışan Şəbnəm Həsənova vurğulayıb ki, bu kimi amillər fəaliyyətimizin və əməkdaşlığımızın zəminində dayanmaqla yanaşı, əməkdaşlığın daha da genişləndirilməsinə geniş və unikal imkanlar yaradır. Türkdilli dövlətlər arasında əməkdaşlığın inkişafı Azərbaycanın xarici siyasətinin prioritet istiqamətlərindən birini təşkil edir. Bununla yanaşı, regional və beynəlxalq təşkilatlara sədrliyi zamanı Azərbaycan təşkilatların və onlara üzv olan dövlətlərin verdiyi imkanlardan yararlanmaq əvəzinə Prezident İlham Əliyevin rəhbərliyi ilə bundan daha çox həmin təşkilatların fəaliyyətinin daha da gücləndirilməsinə çalışıb. 2019-cu il oktyabrın 15-də Türk Şurasının Bakıda keçirilən VII Zirvə Görüşündə Azərbaycanın təşkilata sədrliyi üzərinə götürməsindən sonra mövcud əməkdaşlıq istiqamətlərinə əlavə olaraq, energetika, səhiyyə, miqrasiya, media, kənd təsərrüfatı, prokurorluq, ədliyyə və humanitar sahələrdə yeni əməkdaşlıq mexanizmlərinin qurulması, Türk Şurasının dünyada nüfuzunun daha da artırılması istiqamətində atdığı addımlar, 2020-ci il aprelin 10-da Prezident İlham Əliyevin təşəbbüsü ilə dövlət və hökumət başçıları səviyyəsində COVID-19 pandemiyasına həsr olunmuş və videokonfrans vasitəsilə təşkil edilmiş ilk beynəlxalq tədbir, burada irəli sürdüyü təşəbbüslər individual olaraq dövlətlər və bütövlükdə təşkilatın özü tərəfindən müsbət qarşılanır və təqdir olunur.
“Türk Şurasına sədrliyimiz Azərbaycanın 44 günlük Vətən müharibəsində Qələbə qazanaraq öz ərazi bütövlüyünü bərpa etməsi kimi olduqca tarixi bir mərhələyə təsadüf edib. Tarixin müəyyən dövrlərində məqsədli şəkildə aramıza süni divarlar hörməyə müvəffəq olan məqsədyönlü dairələr 44 gün ərzində türkdilli dövlətlərin xalqlarının Azərbaycan xalqına dəstəyinin qarşısını ala bilmədilər. Bu baxımdan müharibə dövründə onlar ardıcıl olaraq xalqımıza dəstək ifadə ediblər. Bu gün əminliklə və qürurla qeyd edirik ki, Azərbaycanın böyük Zəfəri Türk dünyasında birliyin və həmrəyliyin daha da gücləndirilməsi işində əhəmiyyətli rol oynayıb”, - deyə politoloq fikrini yekunlaşdırıb.
Bölmənin digər xəbərləri
