Azərbaycanla Serbiya arasında müxtəlif sahələrdə sıx əməkdaşlıq mövcuddur
Bakı, 26 may, AZƏRTAC
Milli Məclisin sədri Sahibə Qafarovanın başçılığı ilə parlament nümayəndə Belqradda Azərbaycan səfirliyi tərəfindən 28 may - Müstəqillik Günü münasibətilə keçirilən tədbirdə çıxış edib.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Sahibə Qafarova 1918-ci ildə mayın 28-də Azərbaycan xalqının müsəlman Şərqində ilk demokratik parlament respublikasını təsis etməsindən danışıb. Diqqətə çatdırıb ki, həmin dövrdə ilk parlament və hökumət, dövlət atributları yaradılıb. Parlamentin qəbul etdiyi qanunlar milli müstəqilliyin möhkəmləndirilməsində, ölkənin siyasi, iqtisadi və mədəni inkişafının təmin olunmasında əsas rol oynayıb.
Ötən il Azərbaycan ilə Serbiya arasında diplomatik münasibətlərin qurulmasının 25 ilinin tamam olduğunu deyən S.Qafarova bildirib ki, bu illər ərzində ikitərəfli əlaqələr dinamik inkişaf edib.
Qeyd edilib ki, ölkələrimiz arasında iqtisadi, ticarət və humanitar sahələrdə, eləcə də enerji sektorunda sıx əməkdaşlıq mövcuddur.
Diqqətə çatdırılıb ki, ölkələrimiz arasında münasibətlərə mühüm və müsbət təsir göstərən amillərdən biri də parlamentlərin qarşılıqlı fəaliyyətidir.
Tədbirdə, həmçinin regionda mövcud vəziyyət barədə məlumat verilib, Azərbaycanın azad olunmuş ərazilərdə genişmiqyaslı bərpa işlərinə başladığı vurğulanıb. Eyni zamanda, Qafqazda uzunmüddətli sülhün bərqərar olması üçün məhz Azərbaycanın Ermənistana sülh sazişi təklif etdiyi bildirilib.
Bölmənin digər xəbərləri
