AZƏRBAYCANLI GƏNC TƏDQİQATÇIYA ALMANİYADA SOSİAL ELMLƏR DOKTORU ADI VERİLMİŞDİR

10.12.2009 [11:25]
Çap et
A⁺ A^-

Berlin, 10 dekabr (AZƏRTAC). Dekabrın 8-dǝ hǝmvǝtǝnimiz, Azərbaycanlı Tələbələr və Elmi İşçilər Birliyinin üzvü Azǝr Babayev Almaniyanın Mannheym Universitetindǝ “Keçid cǝmiyyǝtlǝrindǝ siyasi transformasiya: tarixi-institutionalist tǝhlil” mövzusunda doktorluq işini uǧurla (magna cum laude qiymǝti ilǝ) müdafiǝ etmişdir. Burada xüsusǝn transformasiya proseslǝrindǝ tarixǝn formalaşmış siyasi institutların vacib ǝhǝmiyyǝti empirik ǝsaslarla sübut edilmişdir. Bununla yanaşı, Azǝr Babayev demokratiya konseptinin müasir siyasi sistemlǝri adekvat ifadǝ edǝ bilmǝmǝsinǝ dair tezisini dǝ uğurla müdafiǝ etmişdir. O, burada hüquqi dövlǝt ideyasının demokratiya konseptindǝn daha vacib olmasını normativ vǝ tarixi dǝlillǝrlǝ önǝ çǝkmişdir.

Azǝr Babayev hazırda Almaniyanın tanınmış tǝdqiqat institutlarından olan Frankfurt Sülh Tǝdqiqatları İnstitutunun (HSFK) elmi ǝmǝkdaşıdır. “Hakimiyyǝt vǝ sosial sülh“ elmi proqramı çǝrçivǝsindǝ post-dok üzrǝ akademik karyerasını davam etdirǝn A.Babayev, hǝmçinin hǝmin institutda Cǝnubi Qafqaz üzrǝ ekspert kimi fǝaliyyǝt göstǝrir.

Azər Babayevin doktorluq tǝhsilini başa vurduǧu Mannheym Universiteti Baden-Vürttemberg ǝyalǝtindǝ yerlǝşir vǝ xüsusǝn sosial vǝ iqtisadi elmlǝr sahǝsindǝ Almaniyanın vǝ Avropanın aparıcı ali mǝktǝblǝrindǝn hesab olunur.

Vüqar Seyidov

AZƏRTAC-ın xüsusi müxbiri

Berlin