“Azərreyl”in baş məşqçisi: İnanırıq ki, Serbiya klubunu keçəcəyik
Bakı, 16 iyul, AZƏRTAC
Püşk bizim üçün uğurlu oldu.
Bu sözləri AZƏRTAC-a açıqlamasında kişi voleybolçulardan ibarət “Azərreyl” komandasının baş məşqçisi Boris Qrebennikov Çempionlar Liqasının I təsnifat mərhələsində Serbiyanın “Radniçki” klubu ilə keçirəcəkləri oyunlar barədə danışarkən deyib.
O bildirib ki, Serbiya təmsilçisi keçilməyəcək rəqib deyil: “Onlar uzun ildən sonra Serbiya çempionu oldular. Həmin liqa ilə tanışam. Orada gənc və dinamik voleybolçular kifayət qədər var. Lakin biz də zəif deyilik. Heyətimizdə müəyyən dəyişiklər olsa da, əsas oyunçular qalıb. Bu da bizim güclü tərəfimizdir. “Radniçki” komandasında da ciddi yenilənmə olmayıb. Bizi maraqlı iki matç gözləyir. İnanırıq ki, mərhələni adlayan tərəf “Azərreyl” olacaq”.
Qazaxıstanlı mütəxəssis oyuna hazırlaşmaq üçün kifayət qədər vaxtın olduğunu bildirib: “Avqust ayının sonunda məşqlərə start verəcəyik. Yetərincə zaman var. Buna kimi rəqibi yaxşı formada təhlil edəcəyik. Bütün planımızı onlara uyğun quracağıq”.
Qeyd edək ki, mərhələnin ilk oyunları 21-23 oktyabrda olacaq. Bakı klubu rəqibi ilə ilk matçını evdə keçirəcək.
Bölmənin digər xəbərləri
