“AZƏRSUN” ŞƏKƏR ZAVODU TİKMƏYİ PLANLAŞDIRIR
“Azərsun holdinq” şirkəti yaxın zamanlarda İmişli rayonunda şəkər zavodu tikməyi planlaşdırır. Şirkət həmin layihəyə 60 milyon dollara yaxın sərmayə qoymaq niyyətindədir.
Zavodun illik istehsal gücü təqribən 350 min ton olacaqdır. Bu məhsulun 150 min tonu şəkər çuğundurundan, 200 min tonu isə Braziliya və Kubadan idxal olunacaq saflaşdırılmamış şəkərdən hazırlanacaqdır. Buraxılan məhsul həm yerli bazarda, həm də qonşu ölkələrdə satılacaqdır.
“Azərsun holdinq” şəkər çuğunduru plantasiyalarının genişləndirilməsinə də 10 milyon dollar vəsait ayırmaq niyyətindədir. Eyni zamanda , vəsait hesabına fermerlərlə treninqlər keçiriləcək, habelə kənd təsərrüfatı texnikası və toxum gətiriləcəkdir. Vəsaitin müəyyən hissəsini su təchizatı infrastrukturunun yaxşılaşdırılmasına yönəltmək nəzərdə tutulmuşdur. Fermerlər isə holdinqlə şəkər çuğunduru məhsulu ilə hesablaşacaqlar.
Xatırladaq ki, respublikanın şəkərə ehtiyacı ildə 300 min tondur və o, idxalın hesabına ödənilir. Azərbaycanda istehsal olunan şəkər çuğunduru isə digər ölkələrə ixrac olunur.
Bölmənin digər xəbərləri
