“AZTELEKOM” İB TƏBİİ FƏLAKƏT ZONASINDA BƏRPA İŞLƏRİ APARIR
Bakı, 22 iyun (AZƏRTAC). Rabitə və İnformasiya Texnologiyaları Nazirliyinin “Aztelekom” İstehsalat Birliyi (İB) Kür çayında suyun səviyyəsinin qalxması nəticəsində yaranan təbii fəlakət zonasında bərpa işləri aparır.
Nazirlikdən AZƏRTAC-a bildirmişlər ki, təbii fəlakət nəticəsində yaranmış problemlər hələ ki aradan qaldırılmamışdır. Çünki bəzi regionlarda suyun səviyyəsinin yüksək olması şəbəkə infrastrukturuna çıxışa mane olur. Hazırda problemin həllinin bir sıra alternativ variantları nəzərdən keçirilir.
Şirvan şəhərində Bakı istiqamətində yerləşən 15 kilometrə yaxın magistral optik xətt su altındadır. Amma buna baxmayaraq, rabitədə problemlər yoxdur.
“Aztelekom”un 3 briqadası problemlərin aradan qaldırılması üçün təbii fəlakət zonasına göndərilmişdir. Onlar zəif nöqtələri tapır və onların aradan qaldırılması üçün zəruri tədbirlər görürlər. Eyni vəziyyət, həmçinin Sabirabad rayonunda və ona yaxın yaşayış məntəqələrində də müşahidə olunur.
Fəlakət nəticəsində CDMA simsiz rabitənin baza stansiyalarına ziyan dəyməmişdir.
Bölmənin digər xəbərləri
