Bakı Dövlət Universiteti və Ege Universiteti astrofizika sahəsində əməkdaşlıq edəcəklər
Bakı, 5 aprel, AZƏRTAC
Bakı Dövlət Universitetinin (BDU) Fizika fakültəsinin Astrofizika kafedrası ilə Türkiyənin Ege Universitetinin Elm fakültəsinin Astronomiya və kosmos elmləri bölümünün əməkdaşları arasında onlayn görüş keçirilib.
Bu barədə AZƏRTAC-a BDU-dan məlumat verilib.
Görüşdə universitetin Fizika fakültəsinin Astrofizika kafedrasının müdiri, dosent Kəmalə Alışeva BDU ilə Türkiyənin ali məktəbləri arasında əlaqələrin genişləndiyini, son zamanlar qardaş ölkənin bir neçə universiteti ilə əməkdaşlıq müqavilələrinin imzalandığını və müxtəlif istiqamətlərdə ortaq layihələrin planlaşdırıldığını, tezliklə Ege Universiteti ilə də əməkdaşlığın qurulacağına ümid etdiyini vurğulayıb.
O, BDU-nun Astrofizika kafedrasında yerinə yetirilən elmi-tədqiqatlar haqqında məlumat verib.
Ege Universitetinin Elm fakültəsinin dekan müavini professor Esin Sipahi elm və təhsil sahələrində əlaqələrin genişləndirilməsinin xüsusi əhəmiyyət kəsb etdiyini bildirib. O, BDU-nun Astrofizika kafedrası ilə birgə layihələrin, eləcə də gələcəkdə ikili diplom proqramlarının həyata keçirilməsində maraqlı olduqlarını diqqətə çatdırıb.
Tədbir iştirakçıları əməkdaşlıq layihələrinin hər iki tərəf üçün faydalı olacağını qeyd ediblər.
Sonda birgə əməkdaşlıq protokolunun hazırlanması qərara alınıb.
Bölmənin digər xəbərləri
