Bakı Heyvanat Parkının yeni sakini
Bakı, 29 noyabr, G.Mahmudlu, AZƏRTAC
Noyabrın 27-də Bakı Heyvanat Parkının yeni sakini dünyaya gəlib. Zooparkın ən gənc sakini iki gün əvvəl doğulmuş makaka rezusdur. Bundan başqa Sultan toyuğu, Avstriya keçisi, Kamerun keçisi, uzunquyruq meymunlar arasında yeni dünyaya gələnlər var. Zooparkın “qoca” sakinlərinə isə 16-18 yaşlı qonur ayı, dəvə və aslanları misal göstərmək olar.
Bu barədə zooparkın zooloji şöbəsinin müdiri Pərvanə Səfərova AZƏRTAC-a məxsusi müsahibəsində məlumat verib.
Zooparkın tarixindən danışan şöbə müdiri bildirib ki, əsası 1928-ci ildə qoyulan Bakı Heyvanat Parkı əvvəlcə keçmiş Lunaçarski, indiki Nizami parkında guşə kimi fəaliyyət göstərib. Daha sonra fəaliyyətini Bayıl ərazisində davam etdirsə də, torpaq sürüşməsi ilə əlaqədar oradan köçürülüb. Zooparkın ərazisi 1982-ci ilə qədər 2 hektar təşkil edib. Yeni əsrin əvvəllərində heyvanat parkının ərazisi artırılaraq 4,25 hektara çatdırılıb.
Hazırda Bakı Heyvanat Parkında 159 növdə 1400-dən artıq heyvan saxlanılır. Parkda ölkəmizin ərazisində rast gəlinməsə də, adları “Qırmızı Kitab”a düşən heyvanlar da var. Bura üz tutan hər kəsin pələng, yaquar, leopard, Afrika aslanları, ilan, Dağıstan turu kimi heyvanları yaxından görmək imkanı var.
Heyvanat Parkında ornitologiya (quşlar), teriologiya (məməlilər), akvaterrarium və zooloji şöbələr fəaliyyət göstərir. Şöbələrin işçiləri heyvanların vaxtlı-vaxtında qidalanmasına nəzarət edir, baytarlar fauna nümayəndələrinin sağlamlığına cavabdehlik daşıyırlar.
Şöbə müdiri daha sonra digər ölkələrin zooparkları ilə bağlanan mübadilə müqavilələri haqqında məlumat verib: “Zooparkın Rusiya, Ukrayna, Moldova, Gürcüstan və Özbəkistanın heyvanat parkları ilə mübadilə müqaviləsi var. Sentyabrda Daşkənd Heyvanat Parkından zooparka 1 baş yallı qoyun, lama, quzğun, yapalaq və qutan gətirilib. Bakı Heyvanat Parkından isə qonur ayı, fısıldayan qu, tirandaz, Sultan toyuqları göndərilib. Oktyabrda Moskva Zooparkından qulaqlı göy qırqovul, xalçavarı piton, mandarin ördəyi və Dağıstan turu gətirilib. Aparılan mübadilə prosesinin məqsədi tək olan heyvanların cütləşdirilməsi, sayı az olanların çoxaldılmasıdır. Parka bəzən adi vətəndaşlar da heyvanlar hədiyyə edirlər.
Hazırda zooparkın ərazisində IDEA İctimai Birliyinin təsisçisi və rəhbəri Leyla Əliyevanın təşəbbüsü ilə təmir işləri aparılır, heyvanat parkının ərazisinin artırılması planlaşdırılır. Yenidənqurma və bərpa işləri yekunlaşandan sonra heyvanlar geniş ərazilərdə məskunlaşacaq və yeni fauna nümayəndələri gətiriləcək”.
Parkın ziyarətçiləri barədə danışan şöbə müdiri onların əsasən isti aylar və tətillərdə sayının çox olduğunu vurğulayıb. “Zooparkın ziyarətçiləri arasında hər yaşdan olan sakinlər var, lakin əsas üstünlüyü uşaqlar təşkil edir. Digər ölkələrdən gələn turistlər də çox olur. Ziyarətçilər üçün heyvanları yedizdirmək, qoyulan səddi keçmək, onları qıcıqlandırmaq, əsəbiləşdirmək, qəfəslərə toxunmaq qəti qadağandır. Lakin dovşan, keçi kimi ev heyvanlarına meyvə-tərəvəzləri əllə yedizdirmək üçün guşə də təşkil edilib.
Hər bir heyvanın öz qida rasionu var və onu pozmaq həmin heyvanın həyatı üçün təhlükəlidir. Təəssüf ki, bəzi ziyarətçilər fauna nümayəndələrinə yem verərkən qidanı sellofanlarla birgə onların qarşısına atırlar. Bu, onların sağlamlığına ziyan vurur, bəzi hallarda isə tələf olması ilə nəticələnir. Onların ölüm səbəblərinin araşdırılması zamanı mədələrindən kiloqramlarla preslənmiş sellofan çıxarılıb. Buna görə də yalnız ayrılmış guşədə ev heyvanlarını qidalandırmağa icazə verilir”,- deyə söyləyib.
Onun verdiyi məlumata görə, buradakı heyvanların bəzilərindən alınan balaların sayı artırılanda onu vəhşi təbiətə buraxırlar. Həmin heyvanlara oxatan kirpi, canavar və ayını misal göstərmək olar.
Zooparkdakı heyvanların mühafizəsi üçün könüllü yardım əli uzadanlar, əməkdaşlıq edənlər də var. Bu sahədə lisey və orta məktəb şagirdləri daha çox fəallıq göstərirlər. Təhsil ocaqlarından birinin maliyyə yardımı ilə quşların saxlanıldığı ərazi təmir olunub. Heyvanat parkının ərazisində elmi-tədqiqat işləri aparılır, tələbələrdən diplom işi yazmaq üçün müraciət edənlər də var.
Şöbə müdiri onu da qeyd edib ki, Bakı Heyvanat Parkı hər il əlil və xəstə uşaqların zooparkı ziyarət etmələri, canlı aləmin nümayəndələri ilə yaxından tanış olmaları üçün onların bura təmənnasız daxil olmasına şərait yaradır.
Bölmənin digər xəbərləri
