BAKI OLİMPİYA OYUNLARINA EV SAHİBLİYİ ETMƏK ÜÇÜN ƏRİZƏ VERMİŞDİR
AZƏRTAC xəbər verir ki, dünyanın məşhur informasiya agentliklərindən olan Assoşieyted Press Azərbaycanın 2016-cı ildə Olimpiya Oyunlarına ev sahibliyi etmək üçün öz namizədliyini irəli sürməsi barədə məlumat yaymışdır. ABŞ-ın nüfuzlu “İnternational Herald Tribune” qəzetinin dərc etdiyi həmin xəbərdə deyilir ki, Bakı idman sahəsində dövlət siyasətini gücləndirmək, Olimpiya hərəkatını genişləndirmək məqsədi ilə oyunlara ev sahibliyi etmək üçün ərizə vermişdir. Azərbaycan Prezidenti İlham Əliyevin Sərəncamı ilə “Bakı şəhərinin XXXI yay Olimpiya və XV Paralimpiya oyunlarının keçirilməsi üçün namizədliyinin irəli sürülməsi ilə bağlı tədbirlərin həyata keçirilməsi üzrə Təşkilat komitəsi yaradılmışdır. Qəzet yazır ki, Baş nazirin birinci müavini Yaqub Eyyubovun başçılıq edəcəyi komitəyə bu ilin sentyabrında Bakıda keçirilmiş dünya çempionatında yunan-Roma güləşi üzrə yarışda qızıl medal qazanmış Fərid Mansurov da daxildir.
Qəzet daha sonra yazır ki, bu keçmiş sovet respublikası son illərdə özünün nəhəng dəniz neft və qaz ehtiyatları ilə iqtisadi bum yaşamışdır.
Çikaqo, Tokio, Rio-de-Janeyro, Madrid, Praqa və Doha ilə birlikdə Bakı 2016-cı ildə Olimpiya Oyunlarını keçirməyə namizəd olan 7 şəhərdən biridir.
Beynəlxalq Olimpiya Komitəsi 2016-cı il yay Olimpiya Oyunlarının keçiriləcəyi ölkəni 2009-cu ilin oktyabrında seçəcəkdir.
Bölmənin digər xəbərləri
