“BAKI-QUŞÇULUQ” SƏHMDAR CƏMİYYƏTİ AZƏRBAYCAN BEYNƏLXALQ BANKININ SƏRƏNCAMINA VERİLMİŞDİR
İqtisadi İnkişaf Nazirliyi dövlətin idarəsində olan “Bakı-quşçuluq” Səhmdar Cəmiyyətinin (Xırdalan quşçuluq fabriki) səhmlərinin 30 faizini Azərbaycan Beynəlxalq Bankının sərəncamına vermişdir.
ABB-nin mətbuat xidmətindən AZƏRTAC-a bildirmişlər ki, “Bakı-quşçuluq” SC səhmdarlarının avqustun 30-da keçirilən ümumi yığıncağında ABB idarə heyətinin üzvü Nazim İbrahimov SC idarə heyətinin sədri seçilmişdir. Xırdalan quşçuluq fabrikinin yeni icraçı direktoru da təyin edilmişdir. İndi Azərbaycan Beynəlxalq Bankı müəssisədə istehsalın tam bərpası üçün lazımi məbləğdə vəsait ayıracaqdır.
ABB-nin “Bakı-quşçuluq” SC ilə əməkdaşlığı hələ 1999-cu ildən başlanmışdır. Səhmdar Cəmiyyətinin Almaniyadan 50 min toyuq-cücə alması üçün ABB ona 300 min ABŞ dolları məbləğində kredit buraxmışdır. Lakin SC bu krediti müəyyən olunmuş müddətdə ödəmədiyindən, səhmlərinin 27 faizini banka vermişdir. Beləliklə, hazırda “Bakı-quşçuluq” müəssisəsinin səhmlərinin 57 faizi ABB-nin sərəncamındadır.
Xatırladaq ki, Xırdalan quşçuluq fabriki 1998-ci ildə Səhmdar Cəmiyyətinə çevrilmiş və özəlləşdirilmişdir, onun nizamnamə kapitalı 3,9 milyard manatdır.
Bölmənin digər xəbərləri
