Bakı sakinləri Milli Ordumuzla qürur duyur VİDEO
Bunu ictimai rəy sorğusunun nəticələri təsdiq edir
Bakı, 9 dekabr, AZƏRTAC
Bakı sakinlərinin tam əksəriyyəti əmindir ki, Azərbaycanın Milli Ordusu zərurət yaransa Qarabağ problemini hərbi yolla həll etməyə qadirdir. Bunu “Rəy” Monitorinq Mərkəzinin keçirdiyi ictimai rəy sorğusunun nəticələri də təsdiqləyir.
Monitorinq Mərkəzindən AZƏRTAC-a bildiriblər ki, sorğunun nəticələrinə görə, paytaxt əhalisinin 92,8 faizi Silahlı Qüvvələrimizlə bağlı qürur və hörmət hissləri keçirir (2011-ci ilin yayında bu göstərici 91 faiz idi).
İctimai rəy sorğusu, həmçinin göstərir ki, ordunun cəmiyyətdə nüfuzu yüksəkdir. “Ailə üzvlərinizdən birini orduya çağırsaydılar, onun xidmətə yollanmasına üstünlük verərdiniz, yoxsa əsgərlikdən yayınmasına çalışardınız?” sualına cavab verərkən 86,5 faiz respondent hərbi xidmətə yollanmaya üstünlük verdiyini deyib. Rəyi soruşulanların yalnız 7,2 faizi ailə üzvünü əsgərlikdən yayındırmağa cəhd edərdi, 6,3 faizi isə sualı cavablandırmaqda çətinlik çəkib. Xatırladaq ki, 2011-ci ilin yayında keçirilmiş sorğu zamanı bu cavabların nisbəti 84:8:8 olmuşdu.
Sorğu bu yaxınlarda Azərbaycan və Ermənistan qoşunlarının təmas xəttində baş vermiş insidentə də ictimai marağın yüksək olduğunu müəyyən edib. Rəyi soruşulanların demək olar ki, hamısı (98 faiz) Azərbaycanın işğal olunmuş ərazisində mövqelərimizə hücum etməyə cəhd göstərmiş Ermənistan silahlı qüvvələrinə məxsus helikopterin vurulmasından xəbərdardır. Təbii ki, paytaxt sakinləri hərbçilərimizin bu addımını çox müsbət qarşılayıblar: 98 faiz buna müsbət yanaşdığını, cəmi 2 faiz isə cavab verməkdə çətinlik çəkdiyini bildirib.
Dağlıq Qarabağ münaqişəsinin həlli yollarına gəldikdə isə respondentlərin 65 faizi danışıqlara, 35 faizi isə hərbi yola üstünlük verdiyini bildirib. “Sizcə, zərurət yaranarsa, Azərbaycan Qarabağ problemini hərbi yolla həll edə bilərmi?” sualına respondentlərin 63 faizi “bəli, həll edə bilər”, 22 faizi “yəqin ki, həll edə bilər”, 6 faizi “xeyr, həll edə bilməz” cavablarını verib. Rəyi soruşulanların 6 faizi isə cavab verməkdə çətinlik çəkib.
Bir sözlə, ictimai fikir sülhpərvər əhvalda olsa da, işğalçıya qarşı rəhmli də görsənmir. Bakı əhalisi öz ordusu ilə qürur duyur və şübhə etmir ki, zərurət yaranarsa, Silahlı Qüvvələrimiz Qarabağ problemini hərbi yolla həll edəcək.
Omnibus tipli ictimai rəy sorğusu noyabrın 30-dan dekabrın 2-dək Bakı şəhərində keçirilib. Yaşayış yeri üzrə üzbəüz müsahibə yolu ilə keçirilən sorğuya yaşı 18 və yuxarı olan 1300-ə yaxın respondent cəlb edilib. Nisbi xəta 3,4 faizdir.
Bölmənin digər xəbərləri
