AZƏRTAC xəbər verir ki, noyabrın 14-də Bakıda, “Gülüstan” sarayında IV Enerji Sammiti keçirilmişdir.

Azərbaycan Prezidenti İlham Əliyev sammitdə iştirak etmək üçün saraya gələn Türkiyə Prezidenti Abdullah Gülü, Litva Prezidenti Valdas Adamkusu, Ukrayna Prezidenti Viktor Yuşşenkonu, Gürcüstan Prezidenti Mixeil Saakaşvilini, Polşa Prezidenti Lex Kaçinskini, Bolqarıstanın vitse-prezidenti Angel Marini, Macarıstanın Baş naziri Ferents Dyurçanı və Estoniyanın Baş naziri Andrus Ansipi səmimiyyətlə qarşıladı.

Sammitdə ABŞ-ın energetika naziri Samuel Bodman, Avropa İttifaqının enerji məsələləri üzrə komissarı Andris Piebalqs, habelə 21 ölkənin nümayəndələri və diplomatlar da iştirak edirdilər.

Dövlət və hökumət başçıları, nümayəndə heyətlərinin rəhbərləri əvvəlcə rəsmi foto çəkdirdilər.

Beynəlxalq enerji təhlükəsizliyi məsələlərinə həsr olunmuş, əsasən, Xəzər hövzəsindən hasil edilən neftin və təbii qazın Qara dəniz, Baltik dənizi regionlarına və Mərkəzi Avropaya çatdırılması üçün Odessa-Brodı neft kəmərinin yaradılması və digər məsələlərin müzakirəsinin nəzərdə tutulduğu sammiti Azərbaycan Prezidenti İLHAM ƏLİYEV giriş nitqi ilə açdı. Dövlətimizin başçısı sammitdə iştirak edən xarici ölkələrin dövlət, hökumət başçılarını və digər iştirakçıları salamladı.

Sammiti mühüm beynəlxalq tədbir adlandıran Prezident İlham Əliyev bildirdi ki, regiondakı ölkələr artıq enerji təhlükəsizliyi sahəsində mühüm nailiyyətlər əldə edib və Azərbaycanın müəllifi olduğu enerji layihələri bu sahədə daha geniş əməkdaşlıq imkanları açır. “İndi Azərbaycanın neft kəmərləri dünya və Avropa bazarlarına çıxır”, - deyən dövlətimizin başçısı ölkəmiz enerji təhlükəsizliyinə nail olduqdan sonra iqtisadi sabitliyi də təmin etdiyini bildirdi.

Azərbaycan Prezidenti dedi:

-Mən qürur hissi ilə demək istəyirəm ki, Azərbaycanda başlanmış enerji layihələri bu gün daha geniş əməkdaşlıq üçün imkanlar açır. Bizim tikdiyimiz boru kəmərləri Azərbaycan neftini Avropa və dünya bazarlarına çıxarır. Bu, artıq bizim üçün tarixi bir hadisə idi.

Biz, eyni zamanda, regional əməkdaşlığı da genişləndiririk. Xəzər dənizi, Qara dəniz və Baltik dənizi regionları arasında yaxşı regional əməkdaşlıq aparırıq. Bu gün burada iştirakçılar arasında bütün regionlardan dövlət, hökumət başçıları, nümayəndə heyətlərinin rəhbərləri vardır. Hesab edirəm ki, bu, bizim tərəfdaşlığımızın çox yaxşı bir işarəsidir. O deməkdir ki, bu geniş regionlar bir-biri ilə daha da yaxınlaşır. Çünki enerji siyasəti və mövcud olan boru kəmərləri tərəfdaşlığımızı gücləndirir. Zənnimcə, bu da özlüyündə daha çox proqnozlaşdırmaya aparacaq, daha geniş əməkdaşlığa təkan verəcək və biz bundan bəhrələnəcəyik.

İndi Azərbaycanın xaricdən qaz almadığını, Gürcüstan və Türkiyəyə qaz ixrac etdiyini xatırladan Prezident İlham Əliyev ölkəmizdə nəhəng qaz ehtiyatlarının, güclü infrastrukturun olduğunu vurğuladı.

Sonra çıxış edən Gürcüstan Prezidenti MİXEİL SAAKAŞVİLİ dedi ki, Azərbaycan bütün tərəfdaşları üçün mühüm olan enerji təhlükəsizliyi siyasəti nümayiş etdirir. O, enerji siyasəti sahəsində digər ölkələrlə əməkdaşlığın əhəmiyyətindən də danışdı, Gürcüstanın bütün enerji layihələrində təmsil olunmaq istəyini vurğuladı. Qeyd etdi ki, Avropa İttifaqı enerji siyasəti, xüsusilə də Nabukko layihəsi ilə bağlı səylərini daha da genişləndirməlidir.

M.Saakaşvili bildirdi ki, Azərbaycan xalqının ümummilli lideri Heydər Əliyevin uğurlu neft siyasəti bütün regionun inkişafına mühüm təsir göstərmiş, regional əməkdaşlığı gücləndirmişdir.

Litva Prezidenti VALDAS ADAMKUS çıxışında bildirdi ki, ölkələrimizin işbirliyi iqtisadi artıma və əməkdaşlığa təkan verir. Bu baxımdan Bakı sammiti qeyri-adi və region üçün böyük əhəmiyyətli zirvə görüşüdür. Litva Prezidenti Xəzər regionunun enerji layihələrindən istifadə edilməklə enerji mənbələrinin müxtəlifliyinə nail olunması ilə bağlı səyləri alqışladığını söylədi. O, bu baxımdan Xəzər hövzəsi ölkələri ilə Avropa dövlətləri arasında enerji sahəsində əməkdaşlığın əhəmiyyətini vurğuladı.

“Nabukko layihəsi Avropanın enerji təhlükəsizliyinin təmin olunmasında həyati əhəmiyyət daşıyır və Avropa İttifaqı Azərbaycanla sıx əməkdaşlıq etməlidir”, - deyən Valdas Adamkus enerji siyasətinin Avropa qonşuluq siyasəti baxımından da mühüm rolu olduğunu, Bakı-Tbilisi-Ceyhan kəmərinin bu əməkdaşlığı möhkəmləndirdiyini bildirdi.

Polşa Prezidenti LEX KAÇİNSKİ Bakı sammitinin məhsuldar keçəcəyinə əmin olduğunu söylədi. Odessa-Brodı-Qdansk layihəsinin əhəmiyyətindən danışan Polşa rəhbəri dedi ki, dünyada neftlə yanaşı, qaz təchizatı ilə bağlı təhlükəsizlik də mühüm amilə çevrilmişdir. Həm Odessa-Brodı-Qdansk, həm də Nabukko layihələri ilə bağlı planlar bütün Avropanın rifahına yönəlibdir. Əsas məqsəd Avropanın enerji təhlükəsizliyinin siyasi-iqtisadi müstəqilliyinin təmin olunmasıdır. Azərbaycan isə öz potensialına görə, bu məsələdə xüsusi əhəmiyyət kəsb edir.

Türkiyə Prezidenti ABDULLAH GÜL vurğuladı ki, Azərbaycan müstəqillik qazandıqdan sonrakı dövrdə dünya miqyasında enerji təhlükəsizliyinin təmin olunmasında mühüm rol oynayır. Enerji təhlükəsizliyinin qlobal əhəmiyyətindən danışan Türkiyə Prezidenti dedi ki, əməkdaşlığa və qarşılıqlı anlaşmaya söykənən münasibətlərimiz regional layihələrin reallaşması üçün çox faydalıdır.

Bakı-Tbilisi-Ceyhan, Bakı-Tbilisi-Ərzurum neft və qaz kəmərlərinin regional əməkdaşlıqda rolunu vurğulayan Türkiyənin dövlət başçısı irimiqyaslı enerji layihələrinin bölgədə sülhün və sabitliyin təmin olunmasında mühüm amilə çevrildiyini bildirdi.

Ukrayna Prezidenti VİKTOR YUŞŞENKO çıxışında Odessa-Brodı-Qdansk enerji dəhlizinin yaradılmasından danışaraq dedi ki, bu layihə Avropanın enerji təhlükəsizliyinin təmin olunması baxımından böyük əhəmiyyət daşıyır. Ukrayna Prezidenti Krakov sammitindən keçən dövr ərzində dövlətlərarası işçi qrupu səviyyəsində 10 görüşun, milli neft şirkətləri arasında isə 5 görüşün keçirildiyini xatırlatdı.

“Bu gün artıq faydalı dialoq səviyyəsinə çatmışıq”, - deyən Viktor Yuşşenko Odessa-Brodı-Qdansk layihəsinin texniki iqtisadi əsaslandırmasının tamamlanmaqda olduğunu, dekabrda layihənin perspektivləri ilə bağlı yekun qərarın veriləcəyinə əminliyini bildirdi.

Bolqarıstanın vitse-prezidenti ANGEL MARİN enerji siyasəti sahəsində həyata keçirilən səyləri ölkəsinin alqışladığını dedi. O, Nabukko layihəsi ilə bağlı Avropa ölkələrinin səylərini artırmağı təklif etdi və bu layihənin icrasında Azərbaycanın xüsusi önəmini vurğuladı.

Estoniyanın Baş naziri ANDRUS ANSİP enerji təhlükəsizliyini milli təhlükəsizliyin mühüm tərkib hissəsi adlandıraraq dedi ki, bu səbəbdən də enerji təhlükəsizliyinin təmin olunması əsas hədəfdir.

Macarıstanın Baş naziri FERENTS DYURÇAN ölkəsinin Bakı sammitinə böyük önəm verdiyini dedi. O bildirdi ki, Avropa İttifaqı enerji əməkdaşlığının genişlənməsində maraqlıdır, Bakı sammitinin isə bu əməkdaşlığın inkişafı üçün xüsusi əhəmiyyəti vardır.

ABŞ-ın energetika naziri SAMUEL BODMAN Birləşmiş Ştatların Azərbaycan, Gürcüstan və Türkiyə ilə işbirliyində maraqlı olduğunu, ölkəmizin enerji sahəsində əməkdaşlıq baxımından güclü tərəfdaş olduğunu bildirdi.

Avropa İttifaqının enerji məsələləri üzrə komissarı ANDRİS PİEBALQS təmsil etdiyi qurumun bu sahədə Cənubi Qafqaz və Mərkəzi Asiya ilə əməkdaşlığa böyük önəm verdiyini dedi. Bildirdi ki, Avropa İttifaqı neft və qazın nəqlində regional əməkdaşlığı dəstəkləyir.

Rumıniyanın xarici işlər naziri LAZAR KOMENESKU dedi ki, onun ölkəsi də enerji sahəsində regional əməkdaşlıqda maraqlıdır və yeni enerji layihələrinin reallaşması Avropanın maraqlarına uyğundur. Nazir Transxəzər enerji dəhlizinin reallaşmasının vacibliyindən də danışdı.

Yunanıstanın inkişaf naziri XRİSTOS FOLİAS Türkiyə, Yunanıstan, İtaliya və Azərbaycanın daxil olduğu dördtərəfli enerji dəhlizinin yaradılması ideyasını ölkəsinin dəstəklədiyini bildirdi.

Qazaxıstanın energetika və mineral ehtiyatlar naziri SAUAT MINBAYEV dedi ki, hazırda Aktau limanından ildə 10 milyon ton neft ixrac olunur. Onun da 2,4 milyon tonu Bakı vasitəsilə ixrac edilir. İndi Qazaxıstan alternativ nəql prosesini reallaşdırmağı planlaşdırır.

İtaliya xarici işlər nazirinin müavini ALFREDO MANTİKA həm milli, həm də Avropa İttifaqı çərçivəsində enerji layihələrinin icrasında yaxından iştirak edəcəklərini bildirdi.

Türkmənistan xarici işlər nazirinin müavini XOŞGƏLDİ BABAYEV çoxtərəfli nəql marşrutlarının faydalı olacağını vurğuladı.

Latviyanın iqtisadiyyat nazirinin müavini ARTURS BERQHOLS sammitin yüksək səviyyədə təşkilinə görə təşəkkürlərini bildirdi.

Prezident İLHAM ƏLİYEV yekun nitqində sammitdə iştirak etdiklərinə görə qonaqlara minnətdarlıq etdi. “Bu sammit görüləsi işlərin çox olduğu bir regionda keçirilir” - deyən dövlətimizin başçısı Bakı görüşünün regional və beynəlxalq əməkdaşlığa töhfə verəcəyini bildirdi. O dedi: “Bu gün masa ətrafında bizim Bakı-Tbilisi-Ceyhan, Bakı-Tbilisi-Ərzurum, Bakı-Supsa, Odessa-Brodı-Plotsk-Qdansk və Nabukko layihələrinin iştirakçıları və digər nümayəndələr toplaşıblar. Bu layihələrin hamısı mühümdür. Bu layihələrin hamısının bir mənbəyi var - Xəzər dənizi, daha dəqiq desək, Azərbaycan”.

Sammitin yekunlarına dair Bəyannamə qəbul edildi. Bəyannaməyə Avropa İttifaqının üzvü olan 9 ölkə ilə yanaşı, Avropa Komissiyası da qoşulmuşdur.

######