Bakı şəhərində qanunsuz tullantı sahələri ilə bağlı monitorinqlər davam etdirilir
Bakı, 13 iyul (AZƏRTAC). Bakı şəhərinin təmizliyini qorumaq məqsədilə Ekologiya və Təbii Sərvətlər Nazirliyi, “Təmiz Şəhər” Açıq Səhmdar Cəmiyyətinin (ASC) işçi qrupu fəaliyyətini davam etdirir.
“Təmiz şəhər” ASC-dən AZƏRTAC-a bildirmişlər ki, işçi qrup tərəfindən son bir ayda paytaxtın Xəzər, Səbail, Binəqədi, Sabunçu və Suraxanı rayonları ərazisində keçirilən reydlər nəticəsində onlarla qeyri-qanuni tullantı sahələri aşkarlanmışdır.
Eyni zamanda, Suraxanı rayonunun 6 qəsəbəsində (Qaraçuxur, Əmircan, Bülbülə, Hövsan, Yeni Suraxanı, Zığ) sahəsi 200 kvadratmetrdən böyük olan 12 qeyri-qanuni tullantıxanaların qısa müddətdə təmizlənməsi üçün aidiyyəti qurumlara xəbərdarlıq edilmiş və məcburi göstərişlər verilmişdir.
İndiyədək Bakı şəhərinin müxtəlif rayonlarında 116 qeyri-qanuni zibilxanalardan 23-ü təmizlənmiş, 60 min kubmetrdən artıq məişət tullantısı Balaxanı poliqonuna daşınmış və “Təmiz Şəhər” ASC-yə təhvil verilmişdir.
Bölmənin digər xəbərləri
