Sentyabrın 5-də Bakı İdman Sarayında uşu üzrə beynəlxalq turnir – “İpək Yolu Kuboku” yarışları start götürmüşdür. Turnirdə 10 ölkədən 173 idmançının daxil olduğu 2 komanda iştirak edir. Azərbaycan bütün 11 çəki dərəcəsində 33 idmançıdan ibarət 2 komanda ilə təmsil olunmuşdur.

Məlum olduğu kimi, Beynəlxalq Olimpiya Komitəsi idmanın bu növünü 2008-ci ilin Olimpiya oyunlarının proqramına daxil etmək niyyətindədir. Bununla əlaqədar uşunun dünyada şöhrəti getdikcə artır. Ölkəmizdə də Uşu Federasiyası yaradılmışdır və idmançılarımız bir çox çempionat və turnirlərdə iştirak edirlər.

Avropa Uşu Federasiyasının vitse-prezidenti Yol Falkoni çıxış edərək, qonaqlar və idmançılar üçün yaxşı şərait yaradıldığına görə turnirin təşkilatçılarına təşəkkürünü bildirdi. O vurğuladı ki, planetin ən yaxşı uşuçuları Bakıya toplaşmışlar və bu turnir həmin növ üzrə keçirilən ən mötəbər yarışlardan biridir.

Sonra çıxış edən rabitə naziri Nadir Əhmədov dedi ki, indi Azərbaycan idman ölkəsinə çevrilmişdir və respublikamızda idmanın müxtəlif növləri üzrə dünya, Avropa çempionatları, beynəlxalq turnirlər keçirilir. Milli Olimpiya Komitəsinin Prezidenti İlham Əliyevin rəhbərliyi ilə ölkədə idmanın inkişafı sahəsində aparılan siyasət yaxşı nəticələr vermişdir. Ölkənin hər yerində idman kompleksləri tikilir, Azərbaycan idmançıları ən mötəbər yarışlarda qələbələr qazanırlar.

İdmançıların nümunəvi çıxışlarından sonra 55 və 60 kiloqram çəki dərəcələrində görüşlər keçirildi.

Beynəlxalq turnir sentyabrın 7-də başa çatacaqdır.