Bakıda “Həsən bəy Zərdabi və Tiflis mühiti” kitabının təqdimatı olub
Bakı, 17 oktyabr, AZƏRTAC
Azərbaycanda Atatürk Mərkəzində Zərdabişünas, Azərbaycan Yazıçılar Birliyinin üzvü Eldəniz Həsənovun “Həsən bəy Zərdabi və Tiflis mühiti” adlı yeni kitabının təqdimat mərasimi keçirilib.
AZƏRTAC xəbər verir ki, tədbirdə tanınmış elm və mədəniyyət xadimləri, deputatlar, ictimaiyyət nümayəndələri və ziyalılar iştirak ediblər.
Təqdimat mərasimində çıxış edən tanınmış şair və alim İslam Sadıq Həsən bəy Zərdabinin torpaqşünaslıq və yerquruluşu sahəsindəki fəaliyyətindən söhbət açaraq deyib: “Müəllifin yeni kitabında həm elmi, həm də tarixi baxımdan böyük əhəmiyyət daşıyır. Bu kitabdan əvvəl nəşr olunan “Həsən bəy Zərdabi irsi və keşməkeşli həyat yolu”, “Zərdab və Zərdabilər” əsərlərində də Zərdabinin fəaliyyətinin az öyrənilmiş tərəfləri geniş şəkildə təqdim olunur”.
Azərbaycan Mətbuat Şurasının sədri, Azərbaycan Yazıçılar Birliyinin (AYB) sədr müavini Rəşad Məcid kitabda Həsən bəy Zərdabinin həyat yolu, şəcərəsi və onun yaxın qohumlarının Tbilisi mühitindəki rolunun əks olunduğunu diqqətə çatdırıb. “Əsərdə Həsən bəy Zərdabinin ailə bağları, onun Tbilisi şəhəri ilə əlaqələri, bu mühitin onun həyatındakı mühüm rolu diqqətə çatdırılıb. Kitabda yeni faktlar yer alıb ki, bu da əsəri daha da dəyərli edir”,- deyə R.Məcid əlavə edib.
Milli Məclisin deputatı Səyyad Aran qeyd edib ki, müəllif ömrünü Həsən bəy Zərdabinin irsinin tədqiqinə həsr edib. Deputatın sözlərinə görə, Eldəniz Həsənovun əsərində Zərdabinin şəcərəsi ilə bağlı geniş və dəyərli məlumatlar toplanıb. Bu, həm tariximiz, həm də milli kimliyimiz baxımından vacib mənbədir.
Xalq artisti, tanınmış dirijor Yalçın Adıgözəlov Zərdabinin irsinin gələcək nəsillərə çatdırılmasının vacibliyini vurğulayaraq deyib: “Həsən bəy Zərdabi milli mətbuatımızın banisi olmaqla yanaşı, böyük maarifçi və ziyalı idi. Onun irsini qorumaq və gənclərə tanıtmaq hər birimizin borcudur”.
Tədbirdə çıxış edən kitabın müəllifi Eldəniz Həsənov əsərin yaranma məqsədi və əhəmiyyəti barədə danışıb. Bildirib ki, bu kitabda Həsən bəy Zərdabinin və onun ailəsinin Tbilisi mühitindəki həyatı, Zərdabi və Topçubaşov nəsilləri arasındakı qohumluq əlaqələri, gürcü xalqı ilə dostluq münasibətləri geniş şəkildə araşdırılıb.
“Mövzu üzrə aparılan tədqiqatların azlığını nəzərə alaraq, tarixi sənədlərə, arxiv materiallarına, alimlərin əsərlərinə və mətbuat mənbələrinə əsaslanaraq bu kitabı yazdım. Əsərdə Həsən bəy Zərdabinin ulu babası Malik Fətəli bəy, babası Malik Rəhim bəy, atası Salim bəy, eləcə də ailə üzvlərinin həyat yolu, Azərbaycan və Gürcüstan arasında tarixi-mədəni əlaqələr ətraflı işıqlandırılıb: “Əsərin yazılmasında məqsəd həm Zərdabinin nəsil tarixini qorumaq, həm də Azərbaycan–Gürcüstan dostluğunun dərin tarixi köklərini göstərməkdir”,- deyə müəllif əlavə edib.
Tədbirdə çıxış edən digər qonaqlar əsərin elmi və tarixi dəyərini yüksək qiymətləndiriblər.
Bölmənin digər xəbərləri
