Bakıda keçirilən döyüş gecəsi UFC turnirinin tarixinə düşüb
Bakı, 23 iyun, AZƏRTAC
Azərbaycanın ilk dəfə ev sahibliyi etdiyi UFC turnirində yeni rekord qeydə alınıb.
AZƏRTAC “MMA Junkie” nəşrinə istinadən xəbər verir ki, Bakı Kristal Zalında təşkil olunan turnirdə döyüşlər ümumilikdə 2 saat 53 dəqiqə 52 saniyə davam edib. Bu, UFC tarixinə ən uzun döyüş gecəsi kimi düşüb.
Qeyd edək ki, turnirdə 12 döyüş baş tutub. Əsas döyüşlər yüngül çəkidə Azərbaycan idmançısı Rafael Fiziyevlə çilili İqnasio Bahamondes və yarımağır çəkidə ABŞ təmsilçiləri Camal Hill ilə Xalil Rauntri arasında olub.
Bu döyüşlərdən R.Fiziyev və X.Rauntri qalib ayrılıblar.
Azərbaycanın digər təmsilçisi Nazim Sadıxov braziliyalı Nikolas Mottanı nokautla məğlub edib. Yüngül çəkidə mübarizə aparan digər idmançımız Tofiq Musayev isə qırğızıstanlı Mıqtıbek Orolbaya məğlub olub.
Yarışda, həmçinin Muhammad Usman (Nigeriya), Taqir Ulanbekov (Rusiya), Klaudiya Siqula (Polşa), Darya Jeleznyakova (Rusiya), Pak Çun Yon, Sok Hyön Ko (hər ikisi Cənubi Koreya), Məhəmməd Naimov (Tacikistan) və Körtis Bleyds (ABŞ) qələbə qazanıblar.
UFC-nin növbəti turniri iyunun 29-da ABŞ-ın Las-Veqas şəhərində təşkil olunacaq.
Bölmənin digər xəbərləri
