Bakıda separatçılarla bağlı verilən qərar ədalətli məhkəmə prinsipinin bariz nümunəsidir – ŞƏRH
Bakı, 13 fevral, AZƏRTAC
Separatçı fəaliyyətlərdə ittiham olunan erməniəsilli şəxslərlə bağlı Bakıda qəbul edilən məhkəmə qərarı Azərbaycanda hüququn aliliyinin və ədalətli məhkəmə prinsipinin ardıcıl şəkildə təmin olunduğunu bir daha nümayiş etdirir. Bu məhkəmə prosesi həm daxili ictimaiyyət, həm də beynəlxalq müşahidəçilər üçün hüquqi dövlət anlayışının praktikada necə tətbiq olunduğunu göstərən mühüm amil kimi qiymətləndirilir.
Bunu AZƏRTAC-a açıqlamasında Milli Məclisin deputatı Sevinc Hüseynova deyib.
O qeyd edib ki, məhkəmə araşdırmaları zamanı ittihamlar Azərbaycan Respublikasının Konstitusiyasına, Cinayət Məcəlləsinə və ölkənin ərazi bütövlüyünü qoruyan beynəlxalq hüquq normalarına əsaslanıb: “Separatçılıq fəaliyyəti, dövlət suverenliyinə qarşı yönəlmiş çağırışlar və qanunsuz silahlı birləşmələrlə əlaqələr kimi əməllər hüquqi baxımdan ciddi təhlükə mənbəyi hesab olunur və bir çox ölkələrin qanunvericiliyində ağır cinayətlər kateqoriyasına daxildir. Proses zamanı tərəflərin hüquqları tam şəkildə təmin olunub, müdafiə tərəfinin arqumentləri dinlənilib, sübutlar açıq məhkəmə iclaslarında araşdırılıb. Bu amil məhkəmənin hüquqi əsaslardan çıxış etdiyini göstərir”.
Deputat bildirib ki, qərarın ən vacib cəhətlərindən biri məhkəmə prosesinin şəffaf keçirilməsidir. “Məhkəmə iclaslarında qanunun tələblərinə uyğun olaraq açıq müzakirələr aparılıb, hər bir sübut qiymətləndirilib və hökm əsaslandırılmış formada elan edilib. Bu, ədalətli məhkəmə hüququnun – günahsızlıq prezumpsiyası, bərabər tərəflər prinsipi və müdafiə hüququnun praktikada necə təmin edildiyini göstərir. Azərbaycan məhkəmə sistemi bu prosesdə beynəlxalq hüquqi standartlara, o cümlədən insan hüquqları ilə bağlı öhdəliklərə uyğun hərəkət etdiyini ortaya qoyub. Bu mənada verilən qərar emosional və ya siyasi ritorikaya deyil, hüquqi dəlillərə əsaslanıb. Çünki separatçılıq yalnız hüquqi deyil, eyni zamanda, ictimai və siyasi təhlükə mənbəyi kimi qiymətləndirilir. Bu cür fəaliyyətlər cəmiyyətin birliyinə, dövlətin suverenliyinə və regionda uzunmüddətli sabitliyə zərbə vurur. Məhkəmə qərarı bu baxımdan hüquq-mühafizə sisteminin preventiv rolunu da ön plana çıxarır. Eyni zamanda, qanun pozuntularına vaxtında və ədalətli reaksiya verilməsi gələcəkdə oxşar cəhdlərin qarşısının alınmasına xidmət edir”, - deyə o diqqətə çatdırıb.
Sevinc Hüseynovanın sözlərinə görə, beynəlxalq təcrübə göstərir ki, separatçılıqla mübarizə hər bir suveren dövlətin legitim hüququdur: “Əsas şərt həmin mübarizənin hüquqi yollarla, insan hüquqlarına hörmət çərçivəsində aparılmasıdır. Bakıda qəbul edilən məhkəmə qərarı məhz bu balansın qorunduğunu, dövlət maraqları ilə fərdi hüquqlar arasında hüquqi tarazlığın saxlanıldığını nümayiş etdirir. Bütün bunlar onu deməyə əsas verir ki, Bakıda separatçılarla bağlı verilən məhkəmə qərarı hüququn aliliyinin, ədalətli məhkəmə prinsipinin və dövlət suverenliyinə hörmətin bariz nümunəsidir. Həmin qərar göstərir ki, Azərbaycanda qanun qarşısında hər kəs bərabərdir və istənilən qanunsuz fəaliyyət hüquqi müstəvidə, şəffaf və əsaslandırılmış şəkildə qiymətləndirilir. Məhz bu yanaşma uzunmüddətli sabitliyin, ictimai etimadın və hüquqi dövlətin əsasını təşkil edir”.
Bölmənin digər xəbərləri
