BAKIDA TAEKVONDO ÜZRƏ DÜNYA KUBOKU VƏ PARALİMPİYAÇILARIN DÜNYA ÇEMPİONATI KEÇİRİLƏCƏKDİR
Bakı, 9 iyun (AZƏRTAC). Gənclər və İdman Nazirliyində iyunun 10-da Bakıda keçiriləcək taekvondo üzrə Dünya Kuboku və paralimpiyaçıların dünya çempionatı ilə bağlı mətbuat konfransı olmuşdur.
Konfransda Dünya Taekvondo Federasiyasının prezidenti Cunq Von Co, Azərbaycan gənclər və idman naziri Azad Rəhimov, Milli Olimpiya Komitəsinin birinci vitse-prezidenti Çingiz Hüseynzadə, Azərbaycan Taekvondo Federasiyasının vitse-prezidenti Füzuli Musayev iştirak etmişlər.
Nazir Azad Rəhimov ölkəmizdə taekvondonun inkişafından danışaraq, Dünya Kuboku yarışlarına ev sahibliyi etməyimizin əhəmiyyətindən söz açmışdır.
Nazir Bakı İdman Sarayında keçiriləcək yarışda xüsusi elektron avandanlıqdan istifadə olunacağını qeyd etmişdir. Onun sözlərinə görə, bu avadanlıq vasitəsilə idmançılara dəyən zərbələrin sayını dəqiq müəyyənləşdirmək mümkün olacaqdır.
Xüsusi elektron avadanlığın hakimlərin ədalətlilik prinsiplərini qorumasına çox böyük kömək göstərəcəyini bildirən Cunq Von Co bu səfərinin Bakıya dördüncü gəlişi olduğunu söyləmişdir. O, hər gəlişində paytaxtımızın daha da gözəlləşdiyini nəzərə çatdırmışdır. Bakı çempionatının olimpiya oyunlarına hazırlıq məqsədi daşıdığını və çox önəmli olduğunu qeyd edən Cunq Von Co yarışda ən güclü idmançıların qalib gələcəyini bildirmişdir.
F.Musayev Azərbaycan tərəfinin yarışın keçirilməsi ilə bağlı təşkilati işləri yüksək səviyyədə yerinə yetirdiyini qeyd etmişdir.
######
Bölmənin digər xəbərləri
