BAKIDA UŞU ÜZRƏ BEYNƏLXALQ TURNİR BAŞA ÇATMIŞDIR

07.09.2003 [21:13]
Çap et
A⁺ A^-

Sentyabrın 7-də Bakı İdman Sarayında uşu üzrə beynəlxalq turnir – “İpək Yolu Kuboku” yarışları başa çatmışdır. Turnirdə 10 ölkədən 173 idmançının daxil olduğu 12 komanda iştirak edirdi. Azərbaycan bütün 11 çəki dərəcəsində 33 idmançıdan ibarət 2 komanda ilə təmsil olunmuşdu.

Xatırladaq ki, Beynəlxalq Olimpiya Komitəsi idmanın bu növünü 2008-ci ilin Olimpiya oyunlarının proqramına daxil etmək niyyətindədir. Bununla əlaqədar uşunun dünyada şöhrəti getdikcə artır. Azərbaycanda da Uşu Federasiyası yaradılmışdır və idmançılarımız çempionatlarda və turnirlərdə iştirak edirlər.

Bakı turnirində uşu tauoli növündə komanda hesabında Malayziya idmançıları birinci, İran və Çin nümayəndələri isə müvafiq olaraq ikinci və üçüncü yerə çıxmışlar.

Uşu san növündə Azərbaycan idmançılarından Nicat Hüseynov (48 kiloqram), Fərid Qarayev (52 kiloqram), Bağrəddin Səlimov (60 kiloqram), Vüqar Nəsibov (70 kiloqram), Hafiz Baxşəliyev (90 kiloqramdan yuxarı) qalib gəlmiş, Ruslan Musayev , Rəşad Quliyev, Rasəf Mehdiyev və Fikrət Rəhimov gümüş medallar qazanmışlar.

Bu növ üzrə komanda hesabında Azərbaycan idmançıları qalib gəlmiş, sonrakı yerləri Rusiya və İran təmsilçiləri tutmuşlar.