Balakəndə 200-ə yaxın sakin oftalmoloji müayinədən keçib
Bakı, 26 aprel, AZƏRTAC
Balakəndə Akademik Zərifə Əliyeva adına Milli Oftalmologiya Mərkəzinin Dəmiryol Səyyar Klinikası tərəfindən görkəmli oftalmoloq-alimin anadan olmasının 102 illiyinə həsr olunmuş tibbi aksiya keçirilib.
Mərkəzin Elmi-məlumat, tədris və təşkilati-metodik bölməsindən AZƏRTAC-a verilən məlumata görə, Səhiyyə Nazirliyi, “Azərbaycan Dəmir Yolları” Qapalı Səhmdar Cəmiyyəti və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə keçirilən aksiya zamanı 196 nəfər oftalmoloji müayinə olunub.
Müayinələr zamanı sakinlərdə refraksiya patalogiyası, quru göz sindromu, konyunktivit və digər patalogiyalar aşkarlanıb.
Qeyd edək ki, Səhiyyə Nazirliyi və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə respublika rayonlarının əhalisinə xidmət göstərmək üçün 2005-ci ildə mərkəzin Avtomobil Səyyar Klinikası, 2018-ci ildən isə Səyyar Qatarı fəaliyyətə başlayıb. Səyyar klinikanın fəaliyyətinin əsas istəyi pasiyentlərin vaxtında müayinə olunaraq öz səhhətlərindəki problemlərin yerindəcə müalicə edilməsidir. Klinikanın təcrübəli və xaricdə ixtisas keçmiş həkim-oftalmoloqları bütün prosesləri yerinə yetirmək bacarığına malikdirlər.
Hazırda dünyada milyardlarla insan görmə zəifliyi və görmə qabiliyyətini tamamilə itirməsindən əziyyət çəkir. Həmin rəqəm sayı hər il artmaqda davam edir. Mərkəzin keçirdiyi aksiyaların məqsədi vaxtında müayinə və müalicə etməklə korluq hallarının 80 faizinin qarşısını almaq, bununla say faktorunun azalmasına kömək etməkdir. Akademik Zərifə Əliyeva adına Milli Oftalmologiya Mərkəzinin əsas prioriteti isə respublikada korluğun qarşısının alınması üçün tədbirlər görməkdir.
Bölmənin digər xəbərləri
