Balaxanı eko-sənaye parkı yaradılacaqdır
Bakı, 14 iyul (AZƏRTAC). Azərbaycan Respublikasının Prezidenti İlham Əliyevin 4 may 2011-ci il tarixli Sərəncamı ilə təsdiq olunmuş “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində ölkədə təkrar istehsalı inkişaf etdirmək üçün Balaxanı eko-sənaye parkı yaradılacaqdır.
“Təmiz şəhər” Açıq Səhmdar Cəmiyyətindən AZƏRTAC-a bildirmişlər ki, park ərazisində mexaniki emal və istehsal qurğularını hökumət təmin edəcəkdir. Parkın Balaxanı poliqonuna, tullantıların yandırılması zavoduna, o cümlədən əsas nəqliyyat qovşağına yaxınlığı xammal və istehsal edilmiş məhsulun asanlıqla satış bazarına çıxmasına əlverişli imkan yaradacaqdır.
Yaşıl biznesə, əsasən də tullantıların təkrar emalı sənayesinə sahibkarların marağını artırmaq məqsədilə parkın xarici və daxili infrastrukturunun qurulması planlaşdırılır. Belə ki, əraziyə yol salınacaq, elektrik, qaz, su, kanalizasiya və rabitə xətləri çəkiləcəkdir. Parkın girişində qeydiyyat məntəqəsi və tərəzilər qurulacaq, ərazidə ofis və əməliyyat binası tikiləcəkdir.
Bölmənin digər xəbərləri
