İQTİSADİYYAT
BANKLARIN NİZAMNAMƏ KAPİTALI, CƏLB ETDİKLƏRİ ƏMANƏT VƏ DEPOZİTLƏR
2002-ci il avqustun 1-nə olan məlumata görə, bank əməliyyatları aparmaq üçün lisenziyaya malik 85 kredit təşkilatı var. Bunlardan 38-i qeyri-bank kredit təşkilatlarıdır.
Əhalidən əmanətlərin cəlb edilməsinə icazəsi olan 47, xarici valyutada əməliyyatın aparılmasına icazəsi olan 47, qiymətli metallarla əməliyyat aparılmasına icazəsi olan 1, plastik kartlarla əməliyyat aparılmasına lisenziyası olan 18 kredit təşkilatı fəaliyyət göstərir. İyul ayı ərzində daha 2 kredit təşkilatı - Əmrahbank və Turanbank kommersiya bankları plastik kartlarla əməliyyat aparmaq üçün lisenziya almışdır.
Milli Bankın mətbuat xidmətindən AZƏRTAC-a daxil olmuş məlumatda bildirilir ki, göstərilən tarixə respublikada 47 bank, o cümlədən, xarici kapitalın iştirakı ilə 14 bank fəaliyyət göstərmişdir. Xarici kapital 4 bankın nizamnamə kapitalının 50 faizdən 100 faizə qədərini, 8 bankın nizamnamə kapitalının isə 50 faizdən azını təşkil edir. 2 bank isə qeyri-rezident bankların filiallarıdır. Fəaliyyət göstərən kredit təşkilatlarının 197 filialı var.
İyul ayı ərzində bankların nizamnamə kapitalının ümumi həcmi 21,1 milyard manat artaraq, 597,9 milyard manata çatmışdır. Bunun 55,5 milyard manatı dövlət banklarının, 542,4 milyard manatı isə özəl bankların payına düşür. Xarici kapitalın iştirakı ilə yaradılmış bankların nizamnamə fondu 172,7 milyard manat olub ki, bu da ümumi nizamnamə fondunun 28,9 faizinə bərabərdir. Avqustun 1-nə olan məlumata görə, orta hesabla 1 banka düşən nizamnamə fondu 12,7 milyard manatdır.
Bu il avqustun 1-nə banklar tərəfindən cəlb edilmiş əmanətlərin və depozitlərin həcmi 1790,5 milyard manata çatmışdır. Bunun 640,3 milyard manatı və ya 35,8 faizi fiziki şəxslər, 1150,2 milyard manatı və ya 64,2 faizi hüquqi şəxslər tərəfindən yerləşdirilmişdir.