Baş direktor: Seysmik stansiyalarda yerin daxilindəki çox xırda təkanlar da qeydə alınır
Bakı, 4 iyun, AZƏRTAC
Ölkə ərazisində 88 seysmik stansiya quraşdırılıb. Əvvəllər respublikamızda cəmi 13 stansiya var idi. İndi müasir stansiyaların quraşdırılması nəticəsində yerin daxilindəki çox xırda təkanları, hətta maqnitudası 0,01 olanları da qeyd edir, onun aktivliyini nəzarətdə saxlayırıq. Bu cür xırda təkanlar lokal sahələri əhatə edir.
Bunu AZƏRTAC-a açıqlamasında Azərbaycan Milli Elmlər Akademiyasının müxbir üzvü, Respublika Seysmoloji Xidmət Mərkəzinin baş direktoru professor Qurban Yetirmişli deyib.
Seysmik stansiyaların çox həssas olduğunu qeyd edən baş direktor bildirib: "Relie dalğaları adlanan səthi dalğaları da həmin stansiyalar qeydə ala bilir. Stansiyaların ətrafından ağır tonnajlı maşın keçəndə də, güclü külək əsəndə də mərkəzə ötürülən dalğalarda dəyişiklik olur. Bundan başqa, qonşu ölkələrdə baş verən 2-3 maqnitudalı zəlzələləri də qeydə alır. Nəticədə həmin ölkələrdə müşahidə edilən yeraltı təkanların ölkəmizə təsirlərini öyrənirik. Bəzi ekspertlər il başlamamış güclü zəlzələnin olacağı, vulkanların baş verəcəyi ilə bağlı proqnozlar verirdilər. Həmin proqnozları faktlarla cavablandırırıq. Araşdırmalarımıza görə, 2012-ci ildən indiyədək ölkəmizdə maqnitudası 5 baldan yuxarı olan güclü zəlzələlər ən az ötən il qeydə alınıb. Ona görə də əsası olmayan fərziyyələrə inanmamaq və təşvişə düşməmək tövsiyə olunur".
Bölmənin digər xəbərləri
