Başqırdıstanda “Heydər Əliyev – Həyatın 100 anı” kitabının təqdimatı keçirilib
Bakı, 21 oktyabr, AZƏRTAC
“Ulu Öndər Heydər Əliyevin irsinə həsr olunmuş kitabların nəşri” beynəlxalq layihəsi çərçivəsində Başqırdıstan Respublikasının Elmlər Akademiyasında Azərbaycanın böyük dövlət xadimi, Ümummilli Lider Heydər Əliyevin həyat və fəaliyyətinə həsr olunmuş “Heydər Əliyev – Həyatın 100 anı” kitabının təqdimatı keçirilib.
AZƏRTAC xəbər verir ki, Rusiya Federasiyasının Başqırdıstan Respublikasının paytaxtı Ufa şəhərində Başqırdıstan Respublikasının Elmlər Akademiyasının inzibati binasında keçirilən təqdimat mərasimində yerli icra hakimiyyəti orqanlarının, ictimaiyyətin və Başqırdıstanda fəaliyyət göstərən Azərbaycan diasporunun nümayəndələri, ictimai-siyasi, elm, təhsil və mədəniyyət xadimləri iştirak edib.
Tədbir kitabın müəllifi, “Azərbaycanım” beynəlxalq jurnalının baş redaktoru, Beynəlxalq Elmlər Akademiyasının akademiki Emil Nəsirlinin təşəbbüsü ilə, Başqırdıstan Respublikası Elmlər Akademiyasının (BREA) prezidenti Kamil Ramazanovun və BREA akademiki, fizika-riyaziyyat elmləri doktoru, professor Ramil Baxtizinin təşkilati dəstəyi ilə təşkil olunub.
“Heydər Əliyev – Həyatın 100 anı” kitabının müəllifi E.Nəsirli Ulu Öndərin nəsillər üçün örnək olan həyat yolu, eləcə də Azərbaycan dövlətinin möhkəmlənməsi və dünyada layiqli yer tutması istiqamətində həyata keçirdiyi siyasi fəaliyyəti haqqında məlumat verib.
E.Nəsirli müəllifi olduğu və “Ulu Öndər Heydər Əliyevin irsinə həsr olunmuş kitabların nəşri” beynəlxalq layihəsi çərçivəsində Azərbaycan, rus və ingilis dillərində nəşr olunmuş “Heydər Əliyev – Həyatın 100 anı” kitabı haqqında məlumat verərək qeyd edib ki, Azərbaycan dövlətinin müstəqillik əldə etməsindən sonra Ulu Öndərin ən mühüm məqsədlərindən biri hüquqi və sivil dövlət yaratmaq olub. Belə ki, 1995-ci ildə müstəqil Azərbaycan Respublikasının Konstitusiyası qəbul olunub. Ulu Öndər Heydər Əliyevin uğurlu siyasəti nəticəsində mediada senzura aradan qaldırılıb və 1998-ci ildə ölüm hökmü ləğv olunub. Ümumxalq səsverməsi yolu ilə 1993-cü ildə Azərbaycan Respublikasının Prezidenti seçilmiş Ulu Öndər Heydər Əliyevin həyata keçirdiyi siyasət nəticəsində ölkədə siyasi və iqtisadi sabitlik yaranıb, bərpa işləri başlanıb.
Ölkəmizin ərazi bütövlüyünün və suverenliyinin bərpa edilməsi xalqın müdrik oğlunun həyat vəzifəsi olub. Ulu Öndər Heydər Əliyevin ölkəyə rəhbərlik etməyə başladığı gündən bəri Azərbaycanda müstəqillik, iqtisadi inkişaf, azadlıq və elmi tərəqqi dövrü başlanıb. Azərbaycan tədricən dünya ölkələri arasında öz mövqeyini tutub. Ulu Öndərin müstəqillik dövründə həyata keçirdiyi mühüm islahatlar çərçivəsində ordu və sənaye quruculuğunda, iqtisadiyyatda və bir çox digər sahələrdə tərəqqi əldə olunub.
E.Nəsirli Ulu Öndərin güclü tarixi şəxsiyyət olduğunu vurğulayaraq onun öz xalqını dövrün mürəkkəb tarixi-siyasi sınaqlarından uğurla çıxardığını və davamlı mübarizə yolu ilə ona müstəqillik qazandırdığını bildirərək Ümummilli Liderin zəngin həyat yolundan, Azərbaycan xalqı və dövləti qarşısında əvəzsiz xidmətlərindən söhbət açıb.
Təqdimat mərasimində çıxış edən Başqırdıstan Respublikası Qurultayının deputatı Rüstəm Maratoviç Axmadinurov, Başqırdıstan Respublikası Elmlər Akademiyasının (BREA) prezidenti Kamil Ramazanov, BREA-nın akademiki Ramil Nazifoviç Baxtizin, BREA-nın baş elmi katibi, akademik Ruslan İrşatoviç Ableyev, sənətşünaslıq professoru, Başqırdıstan Respublikası Dizaynerlər İttifaqının sədri Mars Lironoviç Axmadullin, neft sənayesi veteranı, tarixçi Engel Axmetoviç Zaynetdinov, “Başqırdıstan veteranı” jurnalının baş redaktoru Svetlana Fainovna Bellinder, BREA-nın vitse-prezidenti Aleksandr Nikolayeviç Deqtaryov, Başqırdıstan Respublikası üzrə Ümumrusiya ixtiraçılar və rasionalizatorlar cəmiyyətinin nümayəndəsi Albert Mirqazimoviç Axmetşin, BREA-nın müxbir üzvü, “BREA-nın carçısı” və “Şərqşünaslıq problemləri” jurnallarının məsul nümayəndəsi Aytuqan İrikoviç Akmanov, BREA-nın Başqırdıstan ensiklopediyası İnstitutunun direktor müavini Bulat Naziroviç və digər natiqlər Ulu Öndər Heydər Əliyevin müstəqil dövlətçilik ənənələrindən söhbət açaraq qeyd ediblər ki, müasir Azərbaycan dövlətinin banisinin həyat yolu hər bir azərbaycanlı üçün əsl örnəkdir. Tədbir iştirakçıları Ulu Öndər Heydər Əliyevin xarici siyasətində xüsusi yeri olan Azərbaycanın qonşu və qeyri-qonşu dövlətləri ilə qarşılıqlı fayda verəcək münasibətlərin, eləcə də Cənubi Qafqazda maraqlara və nüfuza malik olan iri və regional dövlətlərlə münasibətlərin formalaşdırılması haqqında geniş fikir mübadiləsi aparıb.
Sonda E.Nəsirli tədbirin iştirakçılarına “Heydər Əliyev – Həyatın 100 anı” kitabını təqdim edib.
Bölmənin digər xəbərləri
